E grupo di pais miembro di Mercosur a exhorta Venezuela pa garantisa e separacion di podernan y pa respeta e cronograma electoral cu ta planifica. Nan a mustra nan intencion di haya un solucion positivo y democratico na Venezuela, den un declaracion cu a sali diasabra na Buenos Aires, Argentina.
Canciyernan di Argentina, Brasil, Paraguay y Uruguay a traha un documento, tumando como realidad cu Venezuela a presenta un ruptura di su orden democratico, y pa tal motibo nan a reclama pa tuma medidanan concreto hunto cu oposicion, y asina sigura e division di poder den e sistema di gobierno”.
Canciyernan di bloke di Mercosur a invita gobierno di Nicolas Maduro pa respeta e cronograma electoral y asina duna un garantia di goce di derecho humano y garantia fundamental individual “y sin lubida liberacion di preso politico”. Cu e consulta aki anto ta cuminsa un proceso cu por finalisa cu un expulsion di Venezuela, pero prome nan ta traha pa un solucion positivo”, Aloysio Nunes, canciyer di Brasil a splica.
Canciyer Malcorra a lesa e declaracion den un rueda di prensa na canciyeria Argentino, hunto cu su coleganan Eladio Loizaga (Paraguay), Rodolfo Nin Novoa (Uruguay) y Aloysio Nunes (Brasil). Argentina tin presidencia temporal di Mercosur actualmente y a convoca cu urgencia tur canciyer di bloke economico di sur, pa analisa e situacion na Venezuela”. “Nos ta duna apoyo pa logra cumplimento di un cronograma electoral pa eleccion pa gobernador, y cu a ser cambia na aña 2016, como tambe pa autoridad comunal cu tabata planfiica pa 2017, y eleccion presidencial cu ta previsto pa aña 2018, e ministro di exterior di Argentina a splica.
“Aki nos por wak hopi cla cu ta existi un abuso di Tribunal Supremo di Husticia (TSJ) di Venezuela riba Asamblea Nacional. E topico di desacato a ser usa pa hopi tempo caba (…) locual ta mustra cu separacion di poder no ta existi na Venezuela, no ta cumpli cu e orden democratico”, Susana Malcorra a bisa.
E solucion por ta positivo
“Ta berdad cu gobierno di Venezuela a dicidi di hala atras algun decision cu nan a tuma, pero tambe ta berdad cu nan a mantene e situacion di desacato di banda di Asamblea Nacional, anto separacion di poder na Venezuela no ta trahando bon”, Malcorra a splica.
E canciyer di Brasil a bisa cu paisnan cu ta miembro di Mercosur ta busca un “acompañamento y pa asina haya un solucion positivo y democratico pa e crisis na Venezuela, un solucion cu ta un proceso di eleccion, manera presidente di Chile, Michel Bachelet a sugeri tambe”. Maximo Tribunal di Venezuela a revoca dos sentencia, unda nan tabata busca pasa competencia di Asamblea Nacional pa Tribunal Supremo di Husticia, dunando asina hopi poder na presidente di Venezuela.
Oposicion a splica cu e medida cu a tuma lugar durante fin di siman no ta soluciona ningun cos, pasobra nan a califica e situacion ey, como un golpi di estado. Minister Argentino a destaca cu ta fundamental cu tur instrumento democratico por keda activa, y asina pueblo di Venezuela por dicidi ken ta e persona cu ta bay dirigi nan destino”. Malcorra a bisa cu aplicacion di Clausula Democratica na Mercosur y Carta Democratica na OEA “no ta implica cu mester saca e estado cu ta envolvi den e situacion aki”.
E aplicacion di e instrumento aki ta envolvi den un seguimento cerca, acompañamento, buskeda di solucion, dialogo, contribucion, ayudo pa asina sigura e principio democratico cu ta totalmente vigente”, el a splica.
