Mercedes lo crea su propio red di charger pa vehiculonan electrico

(AP) – Mercedes-Benz a bisa cu nan lo crea nan propio red mundial di stacionnan pa charge vehiculonan electrico, cuminsando na Noord America den un intento pa competi cu e lider den benta di vehiculonan electrico Tesla.

E fabricante di vehiculonan di luho Aleman a bisa na e show CES cu nan lo cuminsa crea e red ami e aña aki cu un costo total di net mas cu 1.05 biyon dollar. Ora cu completa esaki den 5 pa 6 aña, e red lo tin mas o menos 400 stacion cu mas di 2,500 plug di poder halto segun e compania.

Rednan na Europa y China y otro mercadonan lo sigui despues di completa henter e red pa fin di e decada, ora cu e compania tin intencion di bende solamente vehiculonan electrico. E red completo lo tin mas di 2,000 stacion pa charge cu mas di 10,000 plug mundialmente segun Ola Källenius, president di e hunta di maneho di e marca a conta reporteronan.

E compania a bisa cu e red di Mercedes lo ta habri pa doñonan di tur tipo di vehiculo electrico, sinembargo doñonan di Mercedes lo por reserva un stacion y ricibi preferencia riba otro marcanan.

E movida aki lo yuda e compania competi cu Tesla, cual ta bisa riba su sitio web cu nan tin 40,000 stacion pa charge mundialmente. Tesla su red ta mas tanto exclusivo pa doñonan di Tesla, aunke e CEO Elon Musk a bisa cu e tin plan di habri esaki pa otro marcanan. E red ta duna Tesla un bentaha competitivo riba otro marcanan di vehiculonan electrico, cual tin cu depende di otro rednan di stacion cu ta di doñonan priva.

Cada stacion lo tin 4 pa 12 ‘port’ cu 350 kilowatt di energia. Mercedes lo comparti e csoto di e red aki di manera igual cu MN8 Energy, un operador di energia solar y di bateria na Merca. E proveedor di red ChargePoint tambe ta un partner den esaki.

E red lo trata y soluciona e preocupacion di clientenan cu no tin suficiente rango pa yega nan destino y haya un stacion pa charge nan auto cu ta funciona pa nan segun Markus Schäfer, Mercedes su hefe di tecnologia.

E stacionnan aki lo ser crea den ciudadnan clave y centronan di e poblacion, cerca di careteranan grandi y negoshinan ademas di restaurantnan. Algun lo ta participando den agencianan cu ta bende Mercedes, e compania a declara. “Nos sa unda nos clientenan ta, nos sa unda nos ta bendiendo nos vehiculonan electrico.”