Un di e exitonan di Aruba den e industria turistico tabata su mercadeo dirigi y efectivo. Pero COVID-19 a trece un paro na e modelo exitoso y Aruba Tourism Authority, ATA, ta re-inventando forma con ta sigui tene e nomber di Aruba halto, pero tambe haci uso di menos fondo, den un forma mas efectivo posibel.

Segun Director di ATA, Ronella Tjin Asjoe Croes, den mercadonan unda situacion no ta permiti biahamento a dicidi pa pone un paro na diferente actividad promocional, “te ora e mercado ta duna atrobe. Asina por bisa cu por ehempel na Hulanda tin un paro riba propaganda di biahe na e momento aki. Sinembargo, nos ta keda activo pa medio di por ehempel relacion publico, haciendo uso di rednan social entre otro, pa no perde e contacto cu futuro biaheronan,” segun e Director di ATA.

E entidad ta sigui tur mercado y tin defini cua disciplina di promocion ta pone riba pausa, den ki situacion y ki ora ta activa atrobe. “Pues e situacion a bin ta exigi hopi mas flexibilidad y creatividad pa ‘stop/ go’ ora ta prudente.”

Mensahe: Aruba ta brinda seguridad

Pa loke ta comunicacion, ATA ta enfoca riba, entre otro, aspecto relata na brinda un vacacion cu ta brinda seguridad, cu e destinacion tin tur medida debidamente cubri pa brinda un vacacion sigur. For di un angulo di salud y di combati Covid-19, ATA ta pone hopi mas enfasis riba esaki den su comunicacion, pero tambe a amplia for di maart 2020 esfuersonan pa cu Customer Care. “Na ATA tin un team dedica na yuda cu cualkier pregunta. Mesun cos claro den mercadonan unda ta promociona Aruba,” Ronella Tjin Asjoe a sigui bisa, agregando cu e website “www.aruba.com a mira bishitanan record na 2020, relaciona cu informacion rondo di Health Requirements.’”

Aruba a cana dilanti cu mercadeo digital

Aruba tabata un di e pioneronan den mercadeo digital, adoptando esaki drasticamente na 2011 tempo cu ATA a bira Sui Generis. Awendia proceso ta sigui y “mirando e trayectoria awo e ta hopi mas personalisa, esta di brinda e persona locual e ta interesa den dje! Pues no ta sirbi tur persona cu e mesun informacion. E informacion cu e persona ta mira y cu ta presenta na dje ta ahusta na su patronchi di comportacion y na su gusto.”

Mescos ATA ta haci tambe den caso di edad. Asina por bisa cu tin entre otro un enfoke hopi mas grandi den esfuersonan di promocion dirigi na e biaheronan ‘millennials.’

Informacion na turista ora ta na Aruba

Recientemente a mira turista cu no a sigui instruccion di DVG pa keda den isolacion y polis mester a actua. Casonan asina ta un excepcion, e Director di ATA a bisa Bon Dia Aruba. “Nos sa dos cos tambe. A test mas y mas hende lo test y mas caso positivo por aparece, pa motibo primeramente di rekisitonan di Merca pa e turista Mericano test prome cu bolbe cas.”

Pero bao tur circunstancia mester keda proteha e imagen di Aruba, cu a rekeri hopi inversion. “Aki tambe ta vigente, cu si tin mas caso positivo lo tin menos turismo. Esaki ta afecta atraccion di turismo, cu ta base di e comunicacion tambe na e consumidor y ‘business partner/endeavor.”’ Como tal, e mensahe clave mester ta cu e cantidad di caso di COVID-19 memey di turista ta hopi abao y lamentablemente a perde un turista, pero no mas, te cu awor.

Seguro pa turista

Tabatin hopi discusion ora cu Aruba a introduci un seguro special pa turistanan cu kier bin Aruba. E seguro ta pa cubri nan gastonan en caso si nan ta positivo. “ Nos ta hopi satisfecho cu e sistema di seguro implementa y tambe di tur otro rekisito. Te cu awo e cantidad di turista infecta y e fayecido, cu a keda na uno, ta minimo si mira esaki desde reapertura di frontera naj 2020. Esaki ta un parti di e informacion clave cu ta comunica internacionalmente. A inverti hopi den e protocolnan cu a resulta exitoso y cu otronan den Caribe en todo caso, awor numa ta dicidi di implementa. Aki ta papia no solamente di implementa e seguro, pero otro accion tambe cu kier sa mas di e ‘Health & Happiness Code’. Tambe mester subraya e Aruba Health App a resalta pa loke ta un di e protocolnan exitoso di Aruba . Un innovacion sigur, cu ta sigui expande pa ta e vehiculo awo pa registracion pa e proceso di vacunacion.”

Aruba vs Caribe

E maneho di mercadeo relaciona cu COVID-19 ta diferencia pa pais y isla. Pero ora cu papia di Aruba, cu ta keda den top 3 of 4 den Caribe pa loke ta demanda y bishitante, “ta compara e ora di Republica Dominicana cu Punta Cana entre otro, Puerto Rico, Jamaica, Bahamas y Aruba. Y e paisnan aki no ta den un secuencia particular,” Tjin Asjoe Croes a bisa.

Republica Dominicana y Mexico Caribense, manera Cancun, a aplica un politica di entrada di turista hopi suave. Por ehempel, no tabatin un maneho di 100 porciento di testing, no tabatin ningun rekisito pa test ora di drenta e pais. Consecuentemente e paisnan ey a ricibi mas bishitante cu cualkier otro destinacion den Caribe. Sinembargo, e paisnan aki mester a ahusta nan maneho, mirando e casonan positivo cu a crece. “Aruba no a experiencia un situacion asina aki. E casonan positivo memey di turistanan a keda hopi abao danki na e rekisitonan cu Aruba a implementa.”

Aruba ta cana dilanti

Director di ATA ta satisfecho cu Aruba a demostra di ta cana dilanti riba hopi otro destinacion. “Aruba ta un di e prome destinacionnan den Caribe cu a bolbe habri su frontera pa Merca, for di Juli 2020 caba. Ademas, a tene e frontera habri consistentemente desde Juli. For di comienzo a introduci un maneho di 100 porciento di test na entrada y esaki a resulta hopi bon. Tambe a crea un seguro unico pa COVID-19, na unda despues di algun luna di operacion y experiencia a ahusta esaki y baha e prijs.” Ta ofrece e Aruba Visitors Insurance awor na US $30 pa estadia, cu prijs special pa mucha. Pero en todo caso, a pesar di tur e rekisitonan aki, e ocupacion di Aruba ta keda den mesun liña cu su competidonan, cu tin exigencianan mucho mas leve of hasta no tin mes na momento cu e turista haci su entrada na e pais.