Merca y Polonia a firma un acuerdo dialuna pa coopera riba tecnologia 5G, mientras preocupacion ta crece tocante e gigante di telecomunicacion Chines, Huawei.
Vice Presidente Mericano, Mike Pence, y Prome Minister Polaco, Mateusz Morawiecki a firma e acuerdo na Warsaw, unda Pence ta representando presidente Donald Trump, kende a cancela e trip aki na ultimo momento pa motibo di horcan Dorian.
E acuerdo ta yega durante un bataya global entre Merca y Huawei, e fabricante mas grandi di mundo di ekipo di infrastructura di red, tocante siguridad di red y miedo di acceso Chines.
E acuerdo ta declara: “Proteha e rednan di comunicacion di proximo generacion aki for di manipulacion of interupcion, y sigura e privacidad y libertad individual di ciudadanonan Mericano, Polaco y di otro pais ta di importancia vital.” Ambos pais a priminti di tene na e principionan desaroya pa oficialnan di siguridad cibernetico for di decenas di pais durante un cumbre na Praga e aña aki pa contraresta menasa y sigura e siguridad di e proximo generacion di rednan mobil.
Pence, papiando na un conferencia di prensa cu presidente Polaco, Andrzej Duda, a bisa cu e ta spera cu e declaracion lo pone ‘un ehempel vital pa resto di Europa tocante e asunto di 5G’.
Na e conferencia, a puntra Duda si Merca a duna Polonia evidencia di spionahe Chines uzando tecnologia di Huawei. E no a menciona Merca den su contesta, pero a bisa: “En berdad, contrainteligencia di Polonia a detecta actividad cu por ta di naturalesa spionahe” y cu fiscalnan ta investigando.
Un comerciante Chines cu a sirbi como director di benta di Huawei na Polonia, y un Polaco kende a coopera cu gobierno riba medidanan di siguridad, a ser aresta na Polonia januari ultimo pa sospecha di spionahe.
Durante un bishita na Suecia siman pasa, Morawiecki a bisa cu ta trahando pa haya inversion di e compania di red y telecomunicacion Sueco, Ericsson, riba desaroyo di 5G na Polonia.
