Merca a alcansa un acuerdo cu El Salvador pa cooperacion riba materia di inmigracion iregular, aunke no ta trata di un pacto di ‘tercer pais seguro”’, e canciyer Salvadoreño, Alexandra Hill a declara diabierna pasa pa e periodistanan na Washington.
“Tur medida ta pa purba di disminui y di garantisa e proteccion di tur e personanan cu ta haya nan mes obliga pa emigra iregularmente pa Merca”, e canciyer Salvadoreño a bisa, sin ofrece detayenan specifico di acuerdo.
Hill a indica cu nan lo ta firma diabierna awor ‘un acuerdo marco pa por traha den colaboracion y cooperacion estrecho riba diferente tema’ di nan interes.
Diario The Washington Post a informa, mencionando funcionario gubernamental di Merca, cu e acuerdo lo permiti pa manda na e pais Centroamericano e solicitante di asilo cu yega na frontera Mericano pa por pidi proteccion desde eynan.
Dia 26 di juli pasa, gobierno di Merca y Guatemala a firma un acuerdo cu lo obliga e mayoria di migrante cu ta atravesa e pais Centroamericano pa pidi asilo eynan, en bes di na teritorio Mericano.
E acuerdo, cu a keda publica pa e gobierno di Guatemala, no ta menciona e termino ‘tercer pais seguro’, expresion cu e agencia di ONU pa refugiado ta emplea pa nombra e nacionnan unda ta reubica e refugiadonan cu tabatin plania yega na otro destino.
Bao e acuerdo, e solicitantenan di asilo cu ta yega na Merca lo ser manda bek pa Guatemala den caso cu, den nan ruta bayendo nort, ta atravesa e pais Centroamericano prome cu yega na teritorio Mericano.
