Administracion di Trump tin plan di colecta muestra di DNA for di solicitante di asilo y otro migrantenan deteni pa oficialnan di inmigracion, y lo añadi e informacion na un database masal di FBI uza pa forsa di cumplimento di ley pa busca criminal, segun un oficial di Departamento di Husticia.
Departamento di Husticia ayera a entrega regulacion cu amienda cual lo rekeri colecta di DNA di casi tur migrante cu crusa entre puntonan oficial di entrada y ta keda deteni, sea temporalmente.
E oficial a bisa cu e reglanan no lo aplica na residentenan permanente legal ni ningun persona drentando Merca legalmente, y tambe muchanan bou 14 aña tin exension, pero no ta cla si solicitante di asilo kende ta yega via entrada oficial lo tin exension.
E oficial a papia cu AP bou condicion anonimo prome cu a publica e regulacion.
Oficialnan di Homeland Security a duna un bista amplio di e plan pa expande colecta di DNA na frontera dos siman pasa, pero no a keda cla si solicitante di asilo lo ta inclui, ni unda e lo cuminsa.
E politica nobo lo permiti gobierno colecta un cantidad di data biometrico di centenares di miles di migrante, lantando preocupacion enorme tocante privacidad y pregunta si data asina lo mester ta obligatorio, hasta ora un persona no ta sospechoso di ningun crimen otro cu crusa un frontera ilegalmente. Gruponan di derecho civil ya a expresa preocupacion cu por mal uza e data, y e politica nobo probablemente lo conduci na accion legal.
Oficialnan di Husticia ta spera pa tin un programa piloto poco despues di e periodo di 20 dia pa duna comentario, y expande for di eynan, segun e oficial. E regulacion nobo ta efectivo awe.
Oficialnan di administracion di Trump ta bisa cu nan ta spera di por resolve mas crimen cometi pa migrante a traves di e aumento den colecta di DNA for di un grupo cu frecuentemente por slip desaparece. E oficial tambe a bisa cu e medida lo ta disuasivo – e stap mas recien cu meta pa descurasha migrantenan di purba drenta Merca door di pone obstaculo den proceso di inmigracion.
Mientras cu presidente Donald Trump y su administracion frecuentemente ta menciona crimen cometi pa migrante como un motibo pa control di frontera mas estricto, estudionan a demostra cu hende ilegal na Merca ta menos probabel di comete un crimen cu ciudadanonan Mericano, y inmigrantenan legal ta menos probabel ainda.
Colecta di perfil di DNA ta permiti bou di un ley nobo expandi na 2009 pa rekeri cualkier adulto aresta pa un crimen federal duna un muestra di DNA. Sikiera 23 estado ta rekeri test di DNA, pero algun ta tuma luga despues cu un sospechoso keda condena pa un crimen.
E database di FBI, conoci como Combined DNA Index System, tin casi 14 miyon di perfil di criminal, plus 3.6 miyon perfil di persona aresta, y 966,782 perfil forensico te cu augustus 2019. E perfil den e database no ta contene nomber ni otro identificador personal pa proteha privacidad; unicamente un identificado di e agencia, number di identificacion di specimen y laboratorio di DNA asocia cu e analisis. Di e forma aki, ora un persona no ta match, nan identificacion no ta exponi.
