Autoridad a bisa cu nan no por splica e motibo pakico un hende homber cu un arma AR a cuminsa tira riba trafico na West Texas, unda cu a mata 7 persona y herida otro 22 persona. E confrontacion a caba ora cu polis a tir’e pafo di un cinema.
Dos agente policial den condicion anonimo a bisa The Associated Press cu a identifica e sospechoso como Seth Ator, di 36 aña di edad. E Hefe di Polis di Odessa, Michael Gerke, a nenga pa bisa publicamente e nomber di e sospechoso durante un conferencia di prensa na television.
E homber arma tabata su so. Investigado federal ta kere cu e homber no tin conexion cu grupo terorista nacional of internacional, asina a informa agente special di FBI, Christopher Combs.
Autoridad a bisa cu esunnan cu a fayece tabata entre edad di 15 y 57 aña, pero no a duna lista di nomber. 3 di e herido ta inclui agente di ley. “E persona tabata core riba caminda y cuminsa tira hende, Polis local y Polis di Estado a keda patras di dje. Nan a impedi pa e drenta un cinema y asina a evita un evento di violencia masivo”, Combs a bisa.
Gobernador republicano, Greg Abbott a marca un lista di tiramento masivo cu mas di 70 persona a fayece for di 2016. “E status di Texas ta inaceptabel y mester tuma accion”, el a declara. Sinembargo Abbott ta sigui sin compromete cu imposicion di ley nobo di arma na Texas.
