Administracion di Trump tin plan pa otorga licencia na companianan Mericano pa provee ‘bienes no sensitivo’ na gigante di tecnologia Chines, Huawei, segun The New York Times a reporta, den un movida cu por yuda fria tension prome cu negociacionnan di comercio.
Presidente Donald Trump a duna aprobacion siman pasa pa cuminsa otorga licencia, e Times a bisa diaranson. A cita persona anonimo, familiar cu e asunto, y no a duna indicacion ki sorto di tecnologia e licencia lo por cubri.
Sancionnan anuncia na mei ta rekeri comerciantenan Mericano obtene un permiso di gobierno pa benta di chip processor y otro tecnologia na Huawei Technologies Ltd., un di e fabricante mas grandi di smartphone y ekipo di red di telecomunicacion.
Huawei, e prome marca di tecnologia global Chines, a bisa cu perdida di acceso na componentenan Mericano, y sosten pa tecnologia manera Google music, maps y otro servicionan, ta menasa su benta di smartphone. Proveedonan Mericano di chip processor y otro tecnologia a bisa cu nan lo perde biyonnan di dollar den entrada.
E reporte ta yega mientras negociadonan Mericano y Chines mester a reuni ayera na Washington, pa un di 13 ronda di negociacion cu meta pa caba cu un guera di tarifa tocante e surplus comercial di Beijing y su ambicionnan tecnologico.
Cas Blanco a pospone cumplimento di e sancionnan, pero fundado di Huawei ta bisa cu e ta spera lo bay dilanti cu nan. Oficialnan Mericano a bisa cu Washington lo permiti benta na Huawei di tecnologia cu ta disponibel di otro fuentenan.
