(AP)—Merca a veto ayera un resolucion di e Conseho di Seguridad di e Organisacion di Nacionnan Uni demandando un alto-el-fuego inmediato dene guera na Gaza pasobra esaki no tabata conecta cu un liberacion inmediato di e rehennan captura pa militantenan di Hamas na Israel den october 2023.
E conseho a vota mayormente den fabor di e resolucion—14 di su 15 miembro a vota “si” incluyendo aliadonan di Merca, Britania y Francia—pero e voto a ser anula pa e veto di Merca. E embahador suplente Mercano Robert Wood a bisa cu Merca a traha pa varios siman pa preveni un veto di un resolucion apoya pa e dies miembronan eligi di e conseho, y a expresa cu e lenguahe di compromiso no a ser acepta.
“Nos a haci cla durante negociacionnan cu nos no por apoya un alto-el-fuego incondicional cu ta fracasa di mira e liberacion di e rehennan,” el a bisa. “Hamas lo mira esaki como un vindicacion di su strategia cinico pa spera y resa cu e comunidad internacional ta lubida riba e destino di mas cu 100 rehen for di mas cu 20 estado miembro cu a ser deteni pa 410 dia.”
E respuesta emocional di e embahador suplente Palestino di ONU, Majed Bamya, pa e veto a refleha e rabia y decepcion amplio na e fracaso di e curpa mas poderoso di ONU pa demanda un fin na e guera, cual a resulta den e morto di mas cu 43,000 Palestino y a laga mayoria parti di e teritorio destrui.
E ausencia di un alto-el-fuego ta permiti un “asalto completo di Israel contra e pueblo Palestino y e tera Palestino,” pa continua, Bamya e conta e conseho. “Un alto-el-fuego lo permiti salba bida—tur bida. Esaki tabata berdad un aña pasa. Esaki ta mas berdad awe.”
Den un declaracion Hamas a condena e veto fuertemente, bisando cu Merca atrobe a demostra “su envolvimento directo den e agresion contra nos pueblo, actuando como un complice den e asesinato di mucha- y hendenan muhe y e destruccion completo di bida civil na Gaza.”
E embahador di Algeria pa ONU, Amar Bendjama, e representante Arabe riba e conseho, a bisa cu e mensahe pa Israel despues di e veto ta: “Bo por continua cu bo genocidio. Bo por continua bo castigo colectivo di e pueblo Palestino cu impunidad completo. Den e camara aki, bo lo disfruta di inmunidad.”
Pero el a priminti cu e miembronan eligi lo regresa pronto cu un resolucion mas fuerte ainda bao Capitulo 7 di e Charter di ONU, cual ta militarmente ehecutable—y nan no lo stop te ora cu e conseho tuma accion.
