Reguladonan Mericano a propone corta fondo pa ekipo Chines den rednan di telecomunicacion Mericano, citando menasa pa siguridad.
Federal Communications Commission (FCC) lo vota otro luna riba un propuesta pa prohibi companianan di telecomunicacion uza subsidio di gobierno pa paga pa ekipo di red for di Huawei y ZTE. E movida mas tanto ta afecta companianan chikito y rural, ya cu companianan grandi Mericano no ta uza ekipo di e companianan Chines en cuestion.
E agencia tambe ta explorando e impacto di rekeri companianan pa elimina nan ekipo di Huawei y ZTW actual. Gobierno ta buscando comentario tocante con e por yuda companianan financieramente si mester haci esey. Legislacion den congreso a propone pone $700 miyon te $1 biyon na banda pa companianan di telecomunicacion reemplasa nan red.
Un grupo comercial pa companianan wireless chikito rural, a bisa cu lo costa te cu $1 biyon pa su decena di compania reemplasa nan ekipo di Huawei y ZTE. E ta bisa cu Huawei tin 40 cliente na Merca (Huawei tambe ta miembro di e grupo comercial, e Rural Wireless Association).
Gobierno Mericano a bisa cu Huawei ta representa un menasa di spionahe, pero no a presenta evidencia cu gobierno Chines ta uza su ekipo pa spiona. E compania ta nenga cu ta uza su ekipo pa propositonan asina. ZTE tambe a nenga cu China ta uza su productonan pa spiona. Un reporte congresional na 2012 a marca ambos compania Chines como un riesgo di siguridad.
Gobierno Mericano tambe ta presionando su aliadonan pa prohibi Huawei for di nan red y a restringi exportacion di tecnologia Mericano na Huawei. Huawei ta e proveedor di mas grandi mundialmente di ekipo di telecomunicacion, como tambe un fabricante mayor di telefon celular.
