Gobierno di Merca a anuncia ayera cu lo prohibi biahe di crucero pa Cuba entrante awe, 5 di juni.
Departamento di Estado a specifica den un comunicado cu “Estadonan Uni no lo permiti bishita na Cuba a bordo di embarcacion di pasahero y embarcacion recreativo, incluyendo crucero y yate, como tambe avion priva y corporativo.”
Apesar di e restriccionnan nobo, e vuelonan comercial lo por sigui opera entre Merca y Cuba. Segun un vocero di Departamento di Estado a splica EFE. Gobierno a dicidi di mantene e vuelonan comercial pasobra Mericanonan di origen Cubano ta uza nan pa bishita nan famia riba e isla, mientras cu e crucero ta ser uza pa turismo, algo cu e Mericanonan tin prohibi pa ley.
Den concreto, e fuente ey a indica cu Merca a dicidi di tuma e medida aki, “pa impedi cu e regimen Cubano y nan servicionan militar, cu ta controla industria di turismo na Cuba, por yega na Dollar Mericano.”
Na Cuba hopi hotel ta propiedad di empresa controla pa forsanan arma y maneha como empresa mixto pa corporacionnan di exterior, manera e grupo Melia, cu sede na Spaña.
Gobierno Mericano a anuncia ayera tambe cu for di awe ciudadanonan Mericano tin prohibi pa haci biahe cultural y educativo di contacto cu pueblo Cubano, na Ingles yama “people to people” y cu a permiti miles di persona bishita e isla desde e cambio den relacion bao gobierno di Obama na 2014.
E acercamento ey, impulsa pa Obama y presidente Raul Castro, a facilita biahe pa Cuba y a beneficia aerolinea y companianan crucero grandemente, cu a cuminsa explota e trayectonan comercial entre ambos pais.
Gobierno di Merca ta argumenta cu e restriccionnan nobo ta trata di frena e “papel desestabilisador” di Cuba na Latinoamerica, specialmente pa su apoyo na dictador Venezolano, Nicolas Maduro, y su homologo Nicaraguense, Daniel Ortega.
