Sospecha di Merca riba companianan tecnologico Chines a keda resalta un biaha mas diabierna ultimo, na momento cu departamento di Comercio a manda un carta na companianan na Merca supuestamente bisando cu nan mester obtene un licencia prome cu exporta cierto producto na e fabricante di chip mas grandi di China, pa motibo di preocupacion pa cu uso militar di e tecnologia.
Departamento di Comercio a bisa den e carta cu exportacion na e Semiconductor Manufacturing International Corporation ‘por presenta un riesgo inaceptabel di diversion na un uso militar na e Republica Popular di China’, segun un reporte diasabra den The New York Times.
Aña pasa, Merca a pone restriccion riba companianan bendiendo aparato na gigante di telecomunicacion Chines, Huawei, tocante preocupacion pa e relacion di Huawei cu gobierno Chines y miedo cu por usa su ekipo pa spiona riba otro pais y companianan.
Y app popular di video, TikTok, propiedad di compania Chines, ByteDance, actualmente ta enfrentando un prohibicion potencial na Merca pa motibo di preocupacion cu e datonan di usuario cu ta colecta por wordo comparti cu gobierno comunista Chines. Tanto Huawei como ByteDance a bisa cu e preocupacionnan aki ta sin base.
Sinembargo, NYT ta nota cu maske SMIC ta e fabricante di semiconductor mas avansa tecnologicamente di China, ta cay añanan atras di fabricantenan di chip lider di industria, y no por fabrica chip cu ta sostene e aplicacionnan mas vanguardista. Y pa e procesor cu si ta fabrica, ta depende riba ekipo y software di companianan Mericano.
Contestando tocante e carta di departamento di Comercio y e restriccionnan nobo riba exportacion, un vocero pa e Bureau di Industria y Seguridad di departamento di Comercio a bisa den un declaracion pa CNET cu BIS no por comenta ‘riba ningun asunto specifico’.
BIS ta ‘constantemente monitor y evalua cualkier menasa potencial na seguridad nacional Mericano y interesnan di politica exterior’, e vocero a agrega, y cu ‘lo tuma accion apropia’ hunto cu su partnernan di interagencia.
SMIC a bisa cu e compania ta fabrica chip y provee servicionnan solamente pa clientenan y propositonan comercial y civil, y no tin relacion cu ehercito Chines.
