(Infobae) – Departamento di Estado (ministerio di Asunto Exterior) di Merca a conseha e ciudadania di su pais pa no biaha pa cinco estado di Mexico cu tal grado di criminalidad, cu a pone nan na e nivel maximo di advertencia, asigna na paisnan den conflicto oarma manera Irak, Siria y Somalia.
Segun expertonan, entre e causanan cu ta splica e creciente violencia na Mexico tin e fragmentacion di e cartelnan di narcotrafico den celnan cada biaha mas chikito y mas violento.
“Crimen organisa y violencia ta presente den areanan di e pais, Departamento di Estado a bisa den un comunicado. “Crimen violento, manera homicidio, secuestro y hortamento di auto ta hopi extenso”, e departamento a agrega. E entidad encarga cu asunto exterior a sugeri e Mericanonan pa no biaha pa e estadonan Mexicano Colima, Guerrero, cu ta inclui e balneario Acapulco, Michoacán, Sinaloa y Tamaulipas, na frontera cu Merca.
Sin embargo, e Secretaria d Turismo di Mexico a bisa cu e mayoria di e destinonan turistico di e pais no inclui den e advertencia di biahe.
“Mas di 28 destino turistico di Mexico, cu ta representa e sitionan mas popular pa biahero internacional, no tin restriccion pa biahero”, e Secretaria a bisa den un comunicado. “E gran mayoria di e destinonan turistico di Mexico ta sigur pa turista nacional y di exterior”, a añadi.
Ademas di e cinco estadonan pa cual Departamento di Estado a recomenda no biaha, e entidad a coloca 11 localidad di Mexico na Nivel 3, loke ta encera un recomendacion pa reconsidera e biahe.
