BOGOTA – Un rato pasa durante un cumbre special di ‘Grupo de Lima’, tabata presente mas cu 50 pais, kendenan a bini hunto pa papia riba e tema di Venezuela. Tambe tabata tey president interino di Venezuela Juan Guaido y Vice Presidente di Merca Mike Pence.
Durante su discurso, Vice Presidente Mike Pence a pidi tur pais cu ta forma parti di e grupo aki pa intensifica e sancion contra di e gobierno di Nicolas Maduro. Na mes momento e la pidi pa duna tur asistencia y reconocemento na personanan señala pa Juan Guaido. Entre e sancionnan ta pa freeze cuentanan bancario di PDVSA y pa transferi tur mandato cu lo por tin pa Juan Guaido y su hendenan.
E Vice Presidente Mericano a ripiti y sigura cu manera President di Merca Donald Trump a bisa algun dia atras, ‘tur opicion ta riba mesa’, dunando indacion cu no ta exclui di uza forsa militar pa intereveni. Sr. Pence ta bisa cu nan ta buscando un solucion y salida pasivo pero no lo keda man crusa mas despues di mira con sostenedonan di e gobierno di Maduro a kima trucknan cu ayudo humanitario pa Venezuela.
Durante e cumbre, Mike Pence a pidi militarnan Venezolano pa laga un banda e sosten pa Maduro y pa reconoce Juan Guaido manera nan president. “Si boso sigui cu e sosten pa Maduro y no baha boso armanan contra e pueblo Venezolano, boso lo mester biba cu e consecuencia”, Sr. Pence a declara. Pence ta bisa cu no lo tin armadura pa scapanan, ni tampoco lo tin un salida for di e cos aki pa nan. “Boso tuma e oferta di Presidente Juan Guaido pa amnestia. Haci e cos sabi. Salba boso mes sino sufri e consecuencianan cu lo ta devastador pa boso.”
Mas informacion di e cumbre aki lo sigui den edicion di nos corant di 26 di februari.
