(AP) – Agencianan di tecnologia Mericano lo ser permiti expande nan servicio na Iran, unda mayoria acceso na internet a ser corta den respuesta na protestanan anti-gobierno, e Departamento di Tesoreria a bisa diabierna,

Iran a cuminsa tuma accion contra di manifestantenan cu ta protestando e fayecimento di hoben di 22 aña Mahsa Amini den custodia di cuerpo policial di moralidad. Television di estado di Iran a sugeri cu mas o menos 26 manifestante y cuerpo policial a ser asesina desde cu violencia a cuminsa durante e fin di siman.

Secretario di Estado Antony Blinken a bisa cu e movida lo yuda contraresta e gobierno su esfuersonan di vigilancia.

“E ta cla cu e gobierno di Iran tin miedo di su mesun hendenan,” Blinken a bisa den un declaracion manda via email. “Masha Amini ta tragicamente morto, y awo e gobierno ta violentamente atakando manifestantenan cu ta debiamente rabia cu e perdida aki.”

E cuerpo policial di moralidad a detene Amini siman pasa, bisando cu e no a cubri su cabey adecuadamente cu su hijab. Amini a colapsa na stacion di cuerpo policial y a fayece 3 dia despues.

Sancionnan di part di Merca a ser imponi diahuebs riba cuerpo policial di moralidad y e lidernan di otro agencianan di aplicacion di ley. E Departamento di Tesoreria a actualisa un licencia general diabierna cu ta autorisa e companianan di tecnologia pa ofrece mas plataforma pa colaboracion di rednan social, conferencia virtual y servicionan basa riba ‘cloud’.

E licencia actualisa aki tambe ta kita e condicion cu e comunicacion mester ta “personal,” cual e tesroreria a bisa tabata poniendo presion riba e companianan pa motibo cu nan mester verifica e proposito di e comunicacion. “Cu e mesun curashi cu e residentenan di Iran ta subiendo caya pa protesta e morto di Mahsa Amini, Merca lo haci dobel su sosten pa e fluho liber di informacion na e hendenan di Iran,” Secretario di Tesoreria Diputado Wally Adayemo a bisa den un declaracion. “Cu e cambionan aki, nos ta yudando e hendenan di Iran tin miho ekipo pa contraresta e gobierno su esfuerso pa vigila y censura nan.”

United Nations a haci un yamado pa investiga Amini su fayecimento.

Amir Rashidi, un Irani exila ken ta director di siguridad di internet y drechonan digital na Miaan Group a bisa cu pa medio di kita restriccionnan, por yuda personanan Irani contraresta e censura di parti di gobierno.

“Tambe esaki lo provee personanan na Iran cu siguridad,” el a bisa. “Ora cu bo por tin bo data fuera di e pais, e servicionan di siguridad no por tin acceso fuera di ley na bo data pa motibo cu awo esaki ta protegi pa ley internacional fuera di Iran.”