(ElNacional) – E hefe di diplomacia di Merca, Anthony Blinken, a afirma ayera cu e mandatario Venezolano Nicolas Maduro no tin un “carchi blanco” pa viola e acuerdo alcansa cu oposicion y, si e haci’e, e lo expone su mes na e reimposicion di e sancionnan cu a wordo lanta.
“Si e regimen a viola di hecho e acuerdo alcansa, e ora, por supuesto, nos lo tuma e medidanan necesario,” Blinken a sigura, un dia despues cu e corte supremo di Venezuela a suspende tur e efectonan di e eleccion primaria opositor, den cual e candidata liberal Maria Corina Machado a keda eligi como ganadora pa un voto abrumador.
“Nos tabata hopi cla tocante esey: nan no ta bay tin un carchi blanco pa realisa accionnan cu ta den contradiccion cu e compromisonan cu a wordo asumi pa avansa pa eleccionnan liber y husto, cu ta un obhetivo comparti cu nos tin cu e oposicion,” Blinken a afirma dilanti un comite di e Congreso cu tabata examina e ayudo di Washington pa Ucrania y Israel.
Blinken tabata contestando asina un pregunta di e senador republicano Marco Rubio, cu a puntra si nan lo reintroduci e sancionnan cu a keda lanta parcialmente den recompensa pa e acuerdo logra den luna di october na Barbados.
Representantenan di Maduro y oposicion a acorda cu e proximo eleccionnan presidencial lo wordo celebra den e di dos semester di 2024 cu e presencia d observadornan internacional.
Como premio y pa alenta e dialogo, Merca a lanta temporalmente y bao condicionnan e sancionnan riba petroleo, gas y oro di Venezuela emitiendo dos licencia y modificando otronan.
Blinken a recorda cu su pais ta reserva e derecho di revoca nan si Caracas no ta cumpli cu su parti di e trato y cu e ta sigui e situacion aki hopi di cerca.
Merca no ta reconoce e reeleccion di Maduro na 2018 door di considera esaki fraudulento. A cambio di e lantamento di sancionnan e ta pidi pa Caracas pa cumpli cu loke a keda acorda, libera e presonan politico y establece un calendar pa e habilitacion di tur candidato den e eleccion.
