(AP) — Administracion di Biden a bisa ayera cu ta bay nenga asilo generalmente na migrantenan cu yega frontera sur di Merca sin busca proteccion prome na un pais door di cual nan a pasa, similar na un intento di administracion di Trump cu nunca a bin na vigor pasobra a keda blokea den corte.
Mientras cu e medida no ta un prohibicion total, si e ta impone limitacionnan severo riba asilo pa cualkier nacionalidad excepto Mexicanonan, kende no mester biaha door di un pais tercero pa yega Merca.
E medida no ta bay drenta na vigor inmediatamente y casi sigur ta bay enfrenta retonan legal.
Oficialnan di e administracion ta spera cu e regla ta bay drenta na vigor ora un regla di era di pandemia cu ta nenga asilo a base di prevencion di transmision di Covid-19 caba, conoci como Autoridad Titulo 42.
Departamentonan di Seguridad Nacional y di Husticia a argumenta cu aumento den cantidad di migrante a laga nan sin opcion. Nan ta anticipa cu crucenan ilegal di frontera ta bay aumenta na entre 11mil pa 13mil pa dia si no tuma ningun accion despues cu Titulo 42 caduca, un aumento di loke ya tabata un averahe diario extraordinariamente halto di 6,500 den e aña fiscal di gobierno cu a caba dia 30 di september.
Pa solicitantenan di asilo biahando door di Centro America y Mexico na frontera Mericano, Costa Rica y Mexico tin e sistemanan di asilo mas robusto. Ambos pais sinembargo ta abruma pa e cantidad di aplicacion pa asilo den añanan recien. Mayoria di esnan buscando asilo na Costa Rica den añanan recien ta Nicaraguensenan huyendo di represion na nan pais. Na 2012, Costa Rica a ricibi apenas 900 aplicacion pa asilo. Aña pasa, a ricibi 80mil. Esaki a crea un atraso enorme y a alarga e proceso, pa loke mas Nicaraguensenan a purba bay Merca aña pasa.
Mexico ta enfrentando aumento den aplicacion pa asilo pa añas y aña pasa a ricbi 118,478, mayoria di Honduras, Cuba, Haiti y Venezuela.
Otro paisnan den e ruta di migracion pa nort tin capacidad hopi limita pa ricibi solicitantenan di asilo, Algun, manera Mexico, ta sufri di nivelnan halto di violencia, otronan tin economianan den dificultad y tiki recurso disponible pa ofrece.
