(AP) – Reguladornan di siguridad na Merca ta aumentando e vigilancia riba Tesla, anunciando investigacionnan tocante stuurwielnan cu ta kita di algun SUV y un accident fatal unda ta trata di un Tesla hacienda uso di e sistema di stuur automatisa ora cu el a accidenta contra un truck di brandweer cu tabata para na California.

National Highway Traffic Safety Administration a bisa diaranson cu nan lo lansa un ekipo specialisa den investigacion di accident pa investiga e accident aki unda a trata di un Tesla Model S y un truck di brandweer di Contra Costa County su departamento di brandweer. E reviso di e caso aki ta forma parti di un investigacion mas grandi di e agencia tocante varios incidente unda un Tesla cu ta coriendo hacienda uso di e sistema di autopiloto ta core bay dal den otro vehiculonan di emergencia cu ta atendiendo otro accident. NHTSA a bira hopi mas agresivo den investiga e problemanan di siguridad cu Tesla den e ana pasa, anunciando varios yamada pa debolbe e vehiculonan y investigacionnan.

E chauffeur di e Tesla Model S a fayece den e accident y un pasahero a keda gravemente herida. 4 miembro di brandweer a ricibi tratamento pa heridanan menor y e truck di brandweer di 1.4 miyon dollar a sufri dañonan. NHTSA ta investigando con Tesla su sistema di autopiloto ta detecta y responde na vehiculonan di emergencia cu ta para na careteranan. Por lo menos 14 Tesla a dal dentro di vehiculonan di emergencia na nivel nacional mientras cu tabata haci uso di e sistema en cuestion.

E sistemanan automatisa aki no semper ta involucr’e den e accidentnan cu NHTSA ta manda investigadonan. Por ehempel, oficialnan di caretera na Ohio a determina cu un Tesla cu a dal den un di e patruyanan den november no tabata operando bao “ningun tipo di modo autonomo.”

Autoridadnan a bisa cu e truck na California tabatin su luznan cendi y tabata para di manera diagonal riba un caretera pa proteha e empleadonan atendiendo un accident cu a tuma luga anteriormente cu no a resulta den heridonan.

Lewis Broschard III, hefe di Contra Costa County Fire Protection District, a bisa cu su departamento ta concerni tocante e riesgonan cu chauffeurnan cu no ta paga tino riba caya por causa na nan mes, pasaheronan y empleadonan di prome respuesta manera ambulance, polis, bombero, etc. “E mortonan innecesario, heridanan y riesgonan na bomber ta perdida di cosnan di hopi balor y tur ta prevenibel.”

Anteriormente diaranson, NHTSA a publica documentonan cu ta revela un investigacion tocante stuurwielnan cu por kita for di mas o menos 120,000 model di Tesla Y. E agencia a bisa cu nan a ricibi 2 keho den 2023 unda a trata di Modelnan di Tesla Y cu a keda entrega na e clientenan sin un di e schroef cu ta wanta e stuurwiel pega. Asina cu aplica forsa riba e stuurwiel mientras ta stuur, esaki ta kita. E agencia ta bisa den su documentonan publica riba nan sitio web diaranson cu ambos incidente a tuma luga mientras e vehiculo tabatin poco uso.