Fiscalia di New York ta investiga desde 2011 e pago di miyones di dollar di Venezuela pa Iran, pa motibo cu Iran a ehecuta, cu costo hopi eleva, un programa di construccion di cas na Venezuela, informacion aki ta mustra for di documento di un ex-empleado di PDVSA.
E documentonan a ser entrega pa un ingeniero cu a firma e documento tambe, pero a prefera di no revela su identidad. El a mustra cu PDVSA a financia contrato cu empresanan di Iran pa 2300 miyon dollar, cu e obheto di construi 24.000 cas, reportahe di Bloomberg a bisa. Sin embargo, gobierno no a distribui tur cas cu nan a paga. E personal di Iran tabata haya 74. 000 dollar pa un cas, locual tabata pago di cinco biaha mas cu e costo real di construccion.
Grupo di investigador ta sospecha cu e regimen di Chavez tabata traslada placa pa Iran, un di paisnan cu miho relacion cu Venezuela entre tur pais na mundo. Oposicion a denuncia cu PDVSA a perde 11.000 miyon dollar pa motibo di corupcion. PDVSA a perde tambe su productividad den ultimo añanan, y e situacion aki a dal duro den e fondonan Chavista pa motibo di e dependencia riba exportacion di hidrocarburo.
Funcionarionan di Merca ta sospecha cu PDVSA a ser usa pa sconde y laba hopi placa pa esnan cu tabatin negoshi ilegal, cu obhetivo di duna ayudo na guerrilla di Colombia pa trafico di cocaina atraves di Venezuela, Bloomberg a agrega.
