Departamento di Husticia di Merca ta prepara un investigacion anti monopolio contra Google, cu ya caba ta suheto na sancionnan na Europa dor di practicanan anti competencia, segun a informa diabierna ultimo e corant Wall Street Journal.
Segun e articulo, e division encarga di asuntonan anti monopolio ta prepara pa “samina di cerca e practicanan comercial” di Google relacion cu nan ‘search engine’ y otro actividad, segun fuentenan anonimo cita dor di e corant.
Comision Federal di Comercio (FTC), cu ta comparti cu Departamento di Husticia e papel di organismo di e competencia, a realisa ya varios aña pasa un investigacion grandi riba e dominio di Google den e tereno di search engine y publicidad, investigacion cu a cera na 2013. Pero algun legislado Mericano a pidi recientemente e apertura di un investigacion nobo.
Comision Europeo a sanciona dia 20 di maart, pa di tres biaha den dos aña e compania Googlecon, cu un boet enorme dor di practicanan abusivo cu nan sistema di publicidad AdSense. Google tambe a wordo ataca frecuentemente dor di presidente Donald Trump, cu tin, hunto cu Facebook, un quota grandi di e mercado publicitario online y nan sistema mobile Android den e mayoria inmenso di telefon celular inteligente na mundo.
