(AP) – Riba diabierna, Merca a expande su esfuersonan pa corta fondonan pa Hamas, anunciando un di dos ronda di sancion contra hende y organisacionnan relaciona cu e grupo desde cu nan a lansa un atake riba Israel cu a causa e morto di 1,400 persona.
E sancionnan nobo ta enfatisa Iran su rol den provee sosten financiero, logistico y operacional na Hamas, segun Oficina di Control di Activo Stranhero di Departamento di Tesoro Mericano a bisa den un declaracion. Nan ta inclui un representante di Hamas na Iran y miembronan di Iran su Guardia Revolucionario.
E sancionnan a keda anuncia mientras Secretario interino di Tesoro, Wally Adeyemo a biaha bay London pa ricibi sosten for di Reino Uni, un di Merca su aliadonan mas cercano, pa e campaña di corta fondo pa Hamas, cual ambos pais ta considera un organisacion terorista.
“Awe e accion ta delinea Merca su compromiso pa desmantela Hamas su rednan di fondo pa medio di despacha nos autoridadnan di sancionnan contraterorismo y traha cu nos partnernan global pa nenga Hamas e habilidad di explota e sistema internacional financiero,” Adeyemo a splica.
Entre esnan cu lo cay bao sancion ta Khaled Qaddoumi, describi como e representante entre Hamas y e gobierno di Iran; Ali Morshed Shirazi y Mostafa Mohammad Khani kendenan ta oficialnan den Qods Force di Guardia Revolucionario di Iran, acusa di train y asisti e luchadornan di Hamas. Tambe Merca a sanciona un cantidad di organisacion, incluyendo Bonyad Shahid Irani, tambe conoci como Martyrs Foundation. Oficialnan a bisa cu e grupo aki, cual ta afilia cu Jihad Palestino Islamico, ta hinca miyones di dollar via e asociacion di caridad basa na Gaza Al-Ansar Charity Assoication pa e familiarnan di e militantenan.
