Hefe di Cas Blanco, Reince Priebus a señala cu ainda nan no a tuma un decision final tocante muraya cu Mexico, pero nan ta evalua un “buffet di opcion”, incluyendo un impuesto di banda di cartel di droga of door di multa migrantenan. “Nos no tin conclusion final di e manera con gobierno Mexicano lo paga pa e muraya aki”, ex presidente di Partido Republicano Priebus, a bisa den un entrevista na CBS.
Por ta door di un impuesto riba bienes cu ta bin for di frontera. Por ta door di un cambio fiscal y un formula di impuesto riba importacion, exportacion y credit. Por ta door di cartelnan di droga. Y por ta riba tur persona cu ta bin ilegal na Merca y lo paga un multa”, a bisa. “Por ta tur cos. Nos tin un buffet di opcion pa paga pa e muraya aki. Nos mester paga e muraya. Nos ta bay construi e muraya. Y nos lo ta hacie.” Priebus a bisa cu administracion di Trump ta na prome etapa di proceso ey.
“Nos ta den presidencia pa shete of ocho dia, y nos a haci cosnan increibel. Mi kier cu e unico cos cu e pueblo por bisa di presidente Trump ta cu e ta cumpli cu tur promesa”, Priebus a expresa.
Priebus a bisa cu publico no mester ta sorprendi di tur accion di e presidente Mericano. Mi ta sorprendi pasobra tur hende ta spanta cu presidente Trump ta traha riba cos cu el a bisa exactamente durante su campaña. Trump a bisa cu e ta hacie y e ta un homber di accion cu ta dunando proteccion na tur ciudadano Mericano”, Priebus a conclui.
Contrario na e discurso aki, senado democrata Bob Menéndez a cualifica exigencia di Trump como absurdo, increibel y ilegal, tocante posibilidad cu Mexico por paga e muraya y asina mes tocante un impuesto na frontera di un 20%. Menendez a sugeri cu Trump ta tene na cuenta cu Mexico ta un mercado di exportacion pa tur producto Mericano na balor di 267 mil miyon dollar, y tambe nan ta comparti un relacion importante den asunto di siguridad cu Merca.
Menendez, cu ta un senado Cubano a considera cu idea di crea un impuesto di 20% pa exportacion di Mexico ta ilegal, bao norma di Tratado di Comercio Liber di Noord America y asina tambe bao Organisacion Mundial di Comercio (OMC). Si nos ta crea un impuesto di 20%, anto nan ta crea otro impuesto tambe, kier men cu persona cu ta contribuyente di Merca mester paga mas pa tur producto di agricultura cu ta yega Merca.
Experto y economista ta di acuerdo cu si administracion di Trump a dicidi pone un impuesto riba exportacion na Merca, anto e prijs di tur bien y servicio mester wordo paga pa e consumidor Mericano.
