Presidente Donald Trump a caba di emiti un orden ehecutivo cu ta contene sancion nobo contra gobierno di Venezuela, despues cu diadomingo pasa presidente Nicolas Maduro a keda reelegi den eleccion fraudulento, cu a haya rechaso di varios gobierno caba.
E informacion a ser duna pa Cas Blanco a traves di un comunicado. E puntonan di sancion ta lo siguiente:
Ta prohibi tur transaccion haci pa cualkier persona Mericano (natural o huridico, o cualkier organisacion o grupo) na Merca, pa haci transaccion relaciona cu:
Compra di cualkier debe di gobierno di Venezuela, incluyendo acrrencia riba tercer persona (‘accounts receivable’);
Cualkier debe di gobierno di Venezuela empeña como ‘collateral’ despues di e fecha di efectividad di e orden ehecutivo aki (efectivo 21 mei 2018);
Benta, transferencia, asignacion o empeño como collateral pa gobierno di Venezuela di cualkier interes di capital den cualkier entidad den cual gobierno di Venezuela tin un interes di 50% o mas.
Ademas e orden ta defini bon cla cu bao di e termino ‘US person’ ta comprende tur ciudadano Mericano, tur stranhero cu permanencia den e pais, tur entidad lanta bao ley Mericano, o otro hurisdiccion dentro di teritorio Mericano, incluyendo nan subsidiario den exterior, o cualkier persona dentro di Merca.
E orden ta defini tambe cu bao di gobierno di Venezuela ta comprende tur entidad liga na gobernacion, mencionando explicitamente Petroleos de Venezuela S.A. y Banco Central di Venezuela.
Cu e accion aki, gobierno di Merca a duna respuesta rapido riba e pregunta kico gobierno Venezolano por spera di nan den e situacion nobo, crea pa e resultado di e eleccion presidencial.
(fuente: NTN24/lapatilla.com)
