Centro di control y prevencion di enfermedad di Merca (CDC) a emiti riba diahuebs un advertencia di nivel 3 di biahe pa St.Maarten. E aviso ta recomenda cu e biaheronan Mericano evita tur e paseo no esencial na e pais debi na e riesgo halto di contrae loke ta trata e coronavirus. E advertencia di CDC ta produci despues di 5 dia cu e pais a habri na e biaheronan Mericano y den un medio di aumento rapido di e casonan di coronavirus riba e isla.
Desde diaranson tin un total di 80 casonan activo di e banda Hulandes y 16 di e banda Frances. E reapertura a wordo marca door di bishitanan di funcionarionan gubernamental oficial di rango halto y parti nan interesa den turismo pa por presencia e yegada di e prome vuelo di Merca na e aeropuerto internacional Princess Juliana (PJIA). E riesgo di COVID-19 na St. Maarten ta basta halto, e CDC ta recomenda cu e bishitantenan evita e biahenan internacional no esencial na St. Maarten.
Algun ehempel di biahenan esencial por inclui biahe pa yuda humanidad, motibonan medico of emergencia familiar. E adultonan mayor, persona di cualkier edad cu cierto condicion medico y otro personanan cu mayor riesgo na un enfermedad grave, lo mester pospone tur biahe incluyendo e biahenan esensial na St.Maarten. “Si en caso e bira malo na St.Maarten e atencion medico lo por ta limita” CDC a bisa diahuebs.
