Merca ta embarga tur propiedad di Venezuela den su teritorio

E sorprendente decreto di dialuna pasa di Presidente Donald Trump a cera radicalmente e contorno economico riba regimen di Nicolas Maduro, poniendo na riesgo di ta isola financieramente cualkier empresa transnacional cu ta haci negoshi ainda cu gobierno Chavista, segun analistanan a conta El Nuevo Herald.

E medida ta implica un riesgo particular pa e magnatenan Venezolano cu a acumula nan fortuna bao di e regimen Chavista. Manera ta yama nan, “enchufados” o “boliburgueses”, hopi di nan te na e momento aki a logra maniobra pa conserva nan posicion.

“Loke nan ta buscando, ta con pa bay contra China, Turkia o Cuba, o cualkier otro nacion cu ta yuda Venezuela haci operacion comercial. Si bo ta cumprando su petroleo, bo ta pasa awor pa e lista di esunnan mas busca,” Russ Dallen, Presidente di e firma Caracas Capital Markets, cu sede na Miami, ta splica.

Pero e decreto tambe ta expone tur empresario Chavista. “Tur persona vincula na Maduro awor a bira radioactivo. Y cualkier cos cu nan mishi, ta bira radioactivo tambe,” Dallen ta agrega. Incluso e personanan cu no ta haci negoshi directamente cu e regimen, pero si cu esunnan cu ta haci esey. E di dos grupo di persona aki ta drenta zona di riesgo, segun Dallen.

E decreto ta hiba e sancionnan na un tereno extrateritorial, extendiendo e prohibicion di haci negoshi cu e regimen pafo di Estadonan Uni. Di manera cu si un empresa stranhero, sea Rosneft o Petrochina, tin un cuenta bancario na Merca, e activonan ey awor por ser confisca. “Esaki no ta afecta persona Mericano so,” Dallen ta mustra.

Rosneft y Petrochina, cu ta sigui cumpra crudo Venezolano a pesar di e sancionnan imponi pa Washington na januari contra Pdvsa, por ta cu nan no tin cuenta bancario grandi na Merca, pero si tin activo internacional cu awor ta na riesgo tambe.

E decreto firma dialuna pasa ta prohibi — salvo loke ta expresamente exento — tur operacion cu cualkier entidad gubernamental di Venezuela, incluyendo organismo estatal manera Banco Central di Venezuela o Pdvsa, como tambe cualkier individuo o agrupacion controla directo o indirectamente pa nan.

E medida tambe ta prohibi persona vincula cu e regimen, di drenta teritorio Mericano.