(ElNacional) – Departamento di Estado di Merca a publica diamars nan rapport anual ariba derechonan humano. Den dje el a denuncia cu e gobierno di Nicolas Maduro ta mantene den prizon centenares di preso pa motibonan politico. Ademas, el a destaca cu hopi di nan ta den condicionnan critico.
Den e documento referente na 2021, Merca a menciona cifranan di e organisacion Foro Penal segun cual den october tabatin 260 preso politico na e pais, 50 di nan den condicionnan di salud critico.
El a indica cu e gobierno di Maduro a permiti algun di e candidatonan opositor participa den e eleccionnan regional cu a tuma luga na november 2021, pero no tabatin condicion pa eleccionnan liber y husto.
E documento a afirma tambe cu e negociacionnan entre e ehecutivo y oposicion, cu a tuma luga na Mexico entre augustus y september, a permiti e regreso na e pais di algun figura den exilio.
“A pesar di e cambionan aki, e regimen di Maduro ta sigui mantene centenares di persona den prizon pa motibonan politico. Ademas el a impedi centenares di candidato di oposicion di eherce tur nan derecho pa participa den e eleccionnan regional”, el a critica.
E documento a cita tambe cu miembronan di e cuerpo di seguridad di Venezuela a comete numeroso violacionnan di derechonan humano y e regimen di Maduro no a tuma niun medida pa identifica of investiga e abusonan aki.
Luna pasa, 2 di e 10 Mericanonan deteni na Venezuela a sali liber despues cu un delegacion di funcionarionan Mericano a biaha pa Caracas pa un reunion cu e gobierno di Maduro.
