(AP) — Departamento di Husticia Mericano ayera a demanda SpaceX, un compania di raket funda y maneha pa Elon Musk, pa supuesto discriminacion den contrato contra refugiado y hende cu a ricibi asilo.
E keho, entrega den un corte administrativo dentro di e departamento, ta bisa cu SpaceX eroneamente a alega cu e leynan federal di control di exportacion ta prohibie di contrata cualkier persona cu no ta ciudadano of residente permanente di Merca. Como resultado, a descurasha refugiado y recipiente di asilo di aplica pa trabao na e compania, segun e keho.
Control di exportacion tipicamente tin meta pa protege seguridad nacional di Merca y reforsa obhetivonan comercial nacional. Nan ta prohibi envio di tecnologia, arma, informacion y software specifico na paisnan fuera di Merca y tambe ta limita con por comparti of entrega articulonan y informacion asina na “personanan Mericano.” Pero Departamento di Husticia a nota cu e termino ta inclui no solamente ciudadano Mericano, pero tambe residente permanente, refugiado y esnan cu a ricibi asilo.
E departamento a acusa cu SpaceX tambe a nenga di considera “hustamente” aplicacionnan for di e grupo di hende aki of pa contrata nan. E posicionnan en cuestion ta inclui ambos esnan cu ta rekeri diplomanan avansa y otronan manera welder, coki y operadornan di crane na e compania.
Merca ta buscando “consideracion husto y pago atrasa” pa hende cu a keda descurasha of nenga empleo na SpaceX pa motibo di e supuesto discriminacion di e compania, ademas di castigonan civil no determina.
SpaceX, cu ta basa na Hawthorne, California, no a responde na un solicitud pa comentario.
