(AP) – Gobierno di Merca ta cumprando mas vacuna di Monkeypox mirando cu e brote internacional ta sigui crece, oficialnan di salud a bisa diabierna.

Desde diabierna, Merca a identifica 45 caso den 15 estado y e Districto di Columbia. Mas di 1,300 caso a ser haya den mas o menos 30 otro pais fuera di e areanan di Africa unda e virus ta un endemia.

Oficialnan a bisa cu e riesgo pa e publico Mericano ta abao, sinembargo nan ta tumando accion pa sigura cu e medidanan medico ta na luga pa trata cu e problema cu ta creciendo. Un vacuna di dos dosis, Jynneos, a keda aproba pa Monkeypox na Merca.

Gobierno di Merca tin mas o menos 72,000 dosis di Jynneos y lo ricibi 300,000 dosis mas di su fabricante Bavarian Nordic, durante e siguiente simannan, segun Dawn O’Connel, ken ta supervisa Gobierno su suministro di tratamento y vacunanan di emergencia.

Riba diabierna, Gobierno a anuncia cu nan a cumpra 500,000 dosis mas di Jynneos for di Bavarian Nordic cual lo keda entrega fin e aña aki. E compania tambe lo reserva otro dosisnan di e gobierno Mericano.

“Nos tin e vacunanna y tratamentonan cu nos tin mester pa responde,” O’Connel, di U.S Department of Health and Human Services a declara.

Monkeypox ta un endemia na partinan di Africa, unda cu personanan ta keda infecta pa medio di mordi di bestianan chikito. E no ta plama facilmente entre personanan. Sinembargo, luna pasa e casonan a cuminsa sali fuera di Europa y na Merca. Varios, pero no tur, di e personanan contagia cu e virus a biaha internacionalmente. Mayoria tambe tabata hende homber cu tabatin relacion sexual cu otro homber, sinembargo oficialnan di salud ta enfatisa cu cualkier persona por keda contagia cu Monkeypox.

Centers for Disease Control and Prevention a bisa diabierna cu tur caso cu nan a mira na Merca ta relaciona cu contacto hopi di cerca.

Oficialnan tambe a alerta dokternan pa keda pendiente di casonan di Monkeypox y a ofrece vacuna pa personanan cu ta den contacto cu esunnan cu ta infecta. Te cu awo, 1,400 vacuna y mas di 110 tratamento a ser manda na e estadonan afecta y hursidiccionnan local, segun e oficialnan.