(AP) — Administracion di Biden a bisa ayera cu ta cumprando 3 miyon bari di petroleo pa cuminsa yena back reservanan strategico Mericano cual oficialnan a usa anteriormente e aña aki den un intento pa stop aumento di prijs di gasolin memey di recortenan di produccion na man di OPEC y un prohibicion riba importacion di petroleo Ruso.
Presidente Joe Biden a retira 180 miyon bari for di Reserva Strategico di Petroleo na maart, hibando e reserva na su nivel mas abao desde añanan 1980. E compra, cu ta bay cuminsa na januari, ta bay cuminsa yena back e reserva y probablemente ta bay sigui cu compra adicional, segun oficialnan.
Departamento di Energia a referi na e compra como “un bon deal pa pagadornan di belasting na Merca” ya cu e prijs ta bay ta mas abao cu e averahe di $96 pa bari cu a bende e petroleo Mericano. E reposicion tambe ta bay reforsa seguridad di energia di Merca, e departamento a bis den un declaracion.
No a anuncia e prijs di compra, pero e benchmark West Texas Intermediate crude oil tabata bende pa $74.60 pa bari diabierna laat.
Prijs pa gasolin, mientras tanto, tabata averahe di $3.18 per galon diabierna, un reduccion for di $3.74 un luna pasa y tiki mas cu $5 pa galon durante e peak na juni, segun AAA auto club.
