(AP) — Cas Blanco a bisa ayera cu Nort Korea a entrega mas cu mil container di ekipo militar y municion na Rusia pa su guera andando na Ucrania.
Speculacion tocante un posible plan di Nort Korea pa recarga e reservanan di municion di Rusia cu a keda bashi pa su guera largo cu Ucrania a bin dilanti luna pasa, ora lider Nort Koreano, Kim Jong Un a biaha pa Rusia pa reuni cu presidente Vladimir Putin y bishita sitionan militar clave.
Vocero di Conseho di Seguridad Nacional di Cas Blanco, John Kirby a bisa cu Merca ta kere cu Kim ta buscando tecnologia di arma sofistica di Rusia a cambio di e municionnan pa asina reforsa e programa militar y nuclear di Nort Korea.
Cas Blanco a publica imagen bisando cu ta mustra cu a pone e containernan riba un barco cu bandera Ruso prome cu a move nan via train na sur occidente di Rusia. A manda e containernan entre dia 7 di september y 1 di october for di Najin, Nort Korea te Dunay, Rusia, segun Cas Blanco.
“Nos ta condena [Nort Korea] pa provee Rusia cu e ekipo militar aki, cu ta bay usa pa ataca ciudadnan Ucraniano y mata civilnan Ucraniano y avansa e guera ilegal di Rusia,” Kirby a bisa.
Merca a revela e determinacion di inteligencia mientras Nort Korea ayera a critica e yegada di un aircraft carrier battle group Mericano na Nort Korea, yamando esaki un provocacion y un biaha mas expresando e posibilidad di usa arma nuclear pa defende su mes.
Agencia Central di Noticia Koreano di e Nort a referi na yegada di e aircraft carrier como “un provocacion militar cla” cu ta proba cu ta realisando un plan di Merca pa ataca Nort Korea. A menasa di responde den linea cu su doctrina nuclear escalatorio cu ta autorisa e uso preferente di arma nuclear.
Merca a acusa Nort Korea di anteriormente suministra municion, shell di artileria y raket na Rusia. Nort Korea anteriormente a rechasa cu a duna arma na Moscu.
Luna pasa, despues di a reuni cu Putin, Kim a haci un yamado pa un aumento exponencial den produccion di arma nuclear y pa su pais desempeña un rol mas grandi den un coalicion di nacion confrontando Merca den un “Guera Friu nobo,” segun medionan estatal Nort Koreano.
Durante e bishita di seis dia di Kim na Rusia, su biahe mas largo den exterior como lider, ambos pais a bisa cu nan a discuti reforsa nan lasonan di defensa, pero no a revela ningun stap specifico. Expertonan di relacionnan internacional ta specula cu ambos pais, mara den confrontacion cu Occidente, tabata pushando pa yega na acuerdonan di transferencia di arma den violacion di resolucionnan di Conseho di Seguridad di ONU.
