E asesor principal di presidente Trump, Larry Kudlow, a declara cu e ta anticipa China pa contra aresta e decision di Trump pa aumenta tarifa di importacion pa producto di China, despues cu e negociacion na Washington a termina sin un acuerdo encuanto comercio entre e dos paisnan, cu ta representa e dos economianan di mayor tamaño.
Kudlow a conta “Fox News Sunday” ayeracu e plan di presidente Donald Trump pa aumenta tarifanan Mericano cu 25% ‘across the board’ lo por tuma varios luna pa crea efecto.
Estadonan Uni a cuminsa aumenta tarifa di importacion riba US$ 200 biyon di importacion Chines di 10% pa 25% diabierna pasa, despues cu funcionarionan Mericano a acusa Beijing di ta hala atras den compromiso haci caba den rondanan anterior di negociacion.
E dos paisnan ta den disputa tocante alegacion di banda Mericano cu supuestamente China ta horta tecnologia y ta presiona companianan Mericano pa entrega secretonan comercial, cu lo ta parti di un campaña agresivo pa logra cu companianan Chines lo bira lider mundial den tecnologia di robot, auto electrico y otro industria avansa. Gobierno di Trump ta alega, y hopi analista independiente ta di acuerdo, cu Beijing a uza tactica agresivo pa duna companianan Chines un bentaha, cu ta inclui hacking di computer di companianan Mericano pa horta secreto comercial y tambe duna subsidio no husto na companianan Chines, pa mantene bentaha den mercado.
Sin embargo, e medidanan di Trump tin consecuencia pa entre otro agricultura Mericano, cu a sinti caba efecto di e medidanan tuma anteriormente, cu a conduci na aumento di costo di produccion.
