ORANJESTAD – Recientemente presidente si sindicato STA, Diego De Cuba a reuni cu minister Chris Romero riba situacion di Union Postal Universal (UPU). Sr. Diego De Cuba ta bisa cu e situacion aki ta uno preocupante no pa Aruba so, pero mundialmente, pa motibo cu Merca a hala tras caba di UPU y dentro di poco esaki lo afecta nos tambe. E mandatario di transporte comunicacion y sector primario hunto cu sindicalista De Cuba ta buscando alternativanan pa sobrevivencia di Aruba Post N.V.
Sr. De Cuba ta bisa cu e reunion a bay den bon esfera pero hopi preocupante. Ta asina cu e sindicato STA ta desea pa negocia un contracto colectivo (CAO) nobo, caminda por mira adelantonan substancial pa e empleadonan di Post N.V. Mirando e echo y e circunstancianan, esaki ta haci’e bastante dificil pa pone un concepto di un CAO riba mesa. Pero si no tin espacio, e ora ey tin cu bay bira inventivo, mirando locual a surgi den mundo postal ta pone cu nan ta den panico awo.
E salimento di Merca di UPU no lo afecta Aruba so, pero henter mundo. E presidente ta bisa cu: “Nos tin comprension pa locual ta e decision di e presidente Mericano”. Logicamente e presidente Mericano ta un persona ‘busuness wise minded’ y ta wak cu e no ta sacando placa afo, e ta corta. Esaki lo afecta Caribe sigur cu si. De Cuba ta bisa cu nan ta consciente cu Aruba tambe lo haya golpi pa e motibo aki. STA hunto cu minister encarga lo purba di yega na solucionnan pa cu e sobrevivencia di Post Aruba N.V.
