(AP)—E cantidad di detencion pa e agentenan di e patruya riba frontera, Border Patrol, di hende ilegal crusando den Merca a cay na mei pa e tercer porcentahe mas abao di cualkier luna durante e presidencia di Joe Biden, mientras cu e cifranan preliminario publica ayera ta mustra cu encuentronan cu migrante ta cayendo mas den e aproximadamente dos siman desde cu e presidente a anuncia reglanan nobo limitando asilo.
E cifranan probablemente ta bon noticia pa un White House cu no por a demostra na votadornan preocupa tocante inmigracion cu e tin control di e frontera pazuid di e nacion. Pero e cantidad di hende biniendo na e frontera frecuentemente ta cambia, dependiendo riba e condicionnan den paisnan leu di Merca y riba traficantenan cu ta beneficia for di migracion global.
Border Patrol a haci 117,900 detencion di hende drentando e pais entre e puntonan di crusada riba e frontera na mei, segun Customs y Border Protection a bisa den un comunicado. Esey ta 9 porciento mas abao compara cu april, e agencia a bisa. E agencia a bisa cu data preliminario desde e anuncio di presidente Biden pa limita acceso pa asilo a mustra detencionnan cayendo pa 25 porciento.
“Nos esfuersonan di ehercemento ta sigui reduci encuentronan riba e frontera suroeste. Pero e hecho ta keda cu nos sistema di inmigracion no tin e recurso pa loke nos ta mirando, segun Troy A. Miller, e hefe interino di CBP.
Merca tambe a beneficia for di ehercemento riba e banda Mexicano di e frontera, unda autoridadnan Mexicano ta trahando pa preveni migrantenan yega na e frontera di Merca-Mexico. E cifranan aki ta parti di un variedad di data relata na inmigracion, comercio y confiscacion di droga cu ta ser publica mensualmente pa CBP. E cifranan relaciona cu inmigracion ta ser evalua durante un tempo di critica politico intenso tocante ken ta drentando e pais y si e administracion di Biden tin control riba e situacion.
Inmigracion ta un preocupacion pa votadornan, cu hopi bisando cu Biden no ta haciendo suficiente pa sigura e fronteranan di e pais. Ex-presidente Donald Trump, e posible nominado republicano pa presidencia, a haci inmigracion un topico clave den su campaña por medio di bisa cu e ta bay deporta hende bibando ilegalmente den e pais en masa y tuma otro medida pa aborda inmigracion.
Despues cu Biden a anuncia su plan pa limita acceso na asilo na e frontera, oponentenan a lanta caso, bisando cu e no ta diferente for di un esfuerso similar bao Trump.
