Secretario di estado y seguridad di Merca tabata na Mexico y a trece un declaracion importante, pa un miho relacion entre ambos pais.
Secretario di Seguridad Nacional di Merca John Kelly, a sigura cu su pais no lo haci deportacion masivo y cu lo actua cu respet pa ley y pa derecho humano. Kelly a trece otro mensahe importante durante su declaracion hunto cu Luis Videgaray, canciller di Mexico, Miguel Angel Osorio Chong, secretario di gobernacion di Mexico y Rex Tillerson, secretario di estado di Merca. Kelly a bisa cu deportacion ta enfoca riba persona cu antecedente penal na Merca y cu deportacion lo ser haci cu colaboracion di gobierno Mexicano. El a laga cla cu deportacion mester ta legal y ordena.
Luis Videgaray, canciyer di Mexico a bisa cu e reunion ey, ta sucede na un momento dificil, pasobra awo ta existi un ambiente di preocupacion pa tur politica cu por perhudica ciudadano Mexicano den teritorio Mericano. Canciyer Videgaray a sigura cu tin varios cos cu nan ta di acuerdo, por ehemplo, cu Mexico ta un pais di transito di migrante, y no ta un pais di origen di migrante mas.
Rex Tillerson, Secretario di Estado di Merca a sigura cu e reunion tabata hopi productivo y cu nan a papia tocante desafio y oportunidad, pa asina haya punto en comun, atraves di cual por logra mas seguridad na frontera.
