(AP)—Un compania di keshi y productonan di lechi ta e fuente di e plamamento di contaminacion di listeria cu a dura 10 aña y a resulta den dos hende morto y mas cu 25 hende malo, segun oficialnan di salud federal a bisa ayera.
Evidencia nobo di laboratorio a conecta keshinan moli y otro productonan di lechi traha pa Rizo-Lopez Foods di Modesto, California, na e plamamento, cual a ser detecta pa prome biaha na juni 2014, e centro pa control y prevencion di malesa (CDC) a bisa.
Desde e tempo ey, al menos 26 hende den 11 estado a bira malo. Esaki ta inclui un persona cu a muri na California na 2017 y un cu a muri na Texas na 2020, oficialnan di CDC a bisa. Dialuna, e compania a yama pa debolbe mas cu 60 keshi moli, yogurt y sour cream bendi bao di e marcanan Tio Francisco, Don Francisco, Rizo Bros, Rio Grande, Food City, El Huache, La Ordena, San Carlos, Campesino, Santa Maria, Dos Ranchitos, Casa Cardenas, y 365 Whole Foods Market.
Previamente CDC a investiga casonan di contaminacion di cuminda conecta cu queso fresco y otro tipo di keshi similar na 2017 y 2021, pero no tabatin suficiente evidencia pa identifica un fuente. Malesanan nobo a ser reporta na december, cual a causa CDC pa habri nan investigacion atrobe. E cadena di listeria conecta cu e plamamento a ser descubri den un muestra di keshi for di Rizo-Lopex Foods. Oficialnan federal a confirma cu queso fresco y cotija produci pa e compania tabata haciendo hende malo.
E productonan debolbi a ser distribui den tiendanan rond full e pais, incluyendo El Super, Cardenas Market, Northgate Gonzalez, Superior Groceries, El Rancho, Vallarta, Food City, La Michoacana, y Numero Uno Markets.
Infeccion di listeria por causa malesa grave, y, den cierto caso, morto. Hende cu ta na estado, mas bieu cu 65 aña di edad, of tin un sistema di immuun zwak ta particularmente vulnerabel. Sintomanan—manera dolor di musculo, keintura y cansancio—usualmente ta cuminsa dentro di dos siman despues di come cumindanan contamina, pero e por cuminsa mas trempan of mas laat tambe.
CDC a bisa cu consumidonan cu tin e producto aki mester benta nan afo y limpia nan frigidaire, cabinet, y otro sitio di contacto bon. Listeria por sobrevivi den frigidaire y por contamina otro cuminda y superficie facilmente.
