Economia mundial ta core e peligro di trastorno mayor pa e politica di gobierno di presidente Trump. E anuncio mas impactante a tuma lugar ayera, cu partimento di medida di tarifa di importacion contra un cantidad di pais, entre nan ‘amigo y enemigo’. E medida general ta di 10% riba tur importacion na Merca, ademas medida mas pisa contra Union Europeo, Hapon, China y como 50 pais mas. Por anticipa medida reciproco di hopi di e paisnan afecta, loke ta crea base pa un situacion caotico na nivel economico mundial.

Desde su entrada como presidente na januari 2025 a keda bon cla cu Trump lo bay guera comercial cu tur pais cu cual Merca tin relacion economico y den e tempo transcuri ta e guera cu Trump a cuminza cu e paisnan aliado den NATO y e bisiña den sur, Mexico, a capta atencion. E arma economico cu Trump a scoge, tambe den su promer periodo di gobernacion, ta aumento drastico di e tarifanan di impuesto di importacion, mientras su obhetivo ta cu un parti grandi di e industrianan cu a muda bay otro pais, pa probecha di circunstancia mas favorable pa produci, lo bolbe Merca. E mudanza pa otro pais durante varios decada tabata mas tanto pa gastonan di salario mas abao, compara cu e nivel di salario na Merca. E importacion di producto bao di un regimen di liber comercio tabatin pa varios decada e bentaha di prijs relativamente abao pa e consumidor Mericano, pero a crea tambe un deficit grandi riba e balanza comercial Mericano. Di otro banda e pais ta exporta hopi servicio cu ta trece mas equilibrio den e cuenta total di bienes y servicio. Esaki ta e caso tambe cu Canada, un di e paisnan mas ataca pa gobierno di Trump, cu tin un surplus grandi den exportacion di producto pa Merca, pero e exportacion di servicio Mericano ta trece finalmente un situacion mas balanza. Si e perspectiva ta pa trece mas industria di regreso na Merca, esaki no ta bay asina facil. Naturalmente tarifa monstruoso por incentiva parti di industria reconsidera nan opcionnan, pero e motibo pakico nan a muda, e nivel di salario na Merca, no a cambia. Ademas, principalmente e industrianan cu hopi maquinaria compleho, ta tuma varios aña pa ‘set up shop’ na Merca atrobe. Tambe aparentemente Trump y su partido ta subestima e interrelacion cu tin por ehemplo den industria di auto entre Merca, Canada y Mexico, basa riba cruza frontera liber di impuesto. Por lo visto e critica y preocupacion di e CEOnan di e empresanan grandi manera Ford, Stellantis y GM no a surti efecto. Mientras tanto, contrario na loke Trump tabata propaga durante campaña, ta e consumidor Mericano ta paga e parti gordo di e impuesto di importacion aumenta. Y anos, cu ta importa mayoria di producto di Merca o via e pais aki, ta obliga di paga e aumento aki tambe. Cu varios aña di un economia mundial caotico nos dilanti, tambe pasobra tur e paisnan cu ta keda afecta no lo sinta tuma esaki braza cruza, ta trece pa nos e pregunta kico por haci den e situacion aki.

Politica di ‘tariffs’ no ta algo nobo; e ta existi pa varios siglo caba. E ta un politica economico, unda ta restringi entrada di cierto producto di exterior cu imposicion di un tarifa halto pa importacion, haciendo asina cu e producto ey lo tin un prijs mas halto riba mercado local, en comparacion cu producto local, creando asina un mercado mas faborable pa producto local. No semper ta trata di un imposicion riba tur producto di un cierto pais, sino di un imposicion general di cierto producto, irespecto e origen den exterior. E medida actual Mericano ta bay hopi elu anto.

Na Aruba, mejor dicho na Antiyas di e tempo ey, tabatin den añanan sesenta (60) di siglo pasa un politica asina, bao influencia di e ola internacional di proteccion di industria local conoci bao di e concepto di “import substitution”. Den region di Caribe hopi pais a participa den e ‘moda’ aki, poniendo tarifa halto pa producto di exterior, cu e intencion di proteha industria local. Nos pais, e tempo ey e constelacion Antiyano, tambe a impone tarifa halto di importacion pa entre otro muebles y ferf na Corsou. Gradualmente e onda di substitucion di importacion a desaparece bao di impulso mundial di liber comercio y surgimento di institucion mundial di comercio (WTO), pero tambe pa un motibo interno na hopi pais. Den region di Caribe hopi industria no tabata logra sobrevivi pasobra e imposibilidad pa produci na escala grandi tabata haci cu nan no por a competi cu industria di pais grandi. Cu ademas un agricultura tradicional cu tambe tabata perde e bataya na nivel mundial, esaki a causa cu den nos region turismo a surgi como e unico salbacion pa varios isla.

Pa bolbe na e situacion internacional actual; ta parce casi inevitable cu nos lo experimenta por lo menos un par di aña turbulento den nos economia. Perdida considerable di poder di compra na Merca y Canada lo tin consecuencia pa turismo y por lo tanto tambe pa gobernacion. Aumento di prijs di producto, tambe di transporte internacional, lo ocasiona aumento di prijs aki tambe. Un di e posibilidadnan cu por contempla ta busca pais cu por suministra cierto producto sin cu mester pasa teritorio Mericano. Esaki lo no ta facil, entre otro pasobra nos tin un sector turistico cu pa su calidad di servicio ta depende tambe di suministro na cierto nivel di calidad. Tin trabao dificil nos dilanti.

LJMADURO – 02-APR-2025