Algun ta usa metodonan peligroso
(AP)—Tin un cantidad creciente di hende muhe cu a bisa cu nan a purba termina nan embaraso nan mes por medio di consumi cosnan manera yerbanan, alcohol of hasta dal nan mes riba bariga, un estudio nobo ta sugeri.
Investigadonan a encuesta hende muhe di edad reproductivo na Merca prome y despues di e cambio di Roe v. Wade na juni 2022. E proporcion cu a reporta purbando di termina nan embaraso nan mes a subi di 2.4 porciento pa 3.3 porciento.
“Hopi hende ta reglando e cosnan ki nan mes,” segun dr. Grace Ferguson, un OB-GYN y proveedor di abortus cu no tabata envolvi den e estudio, cual a ser publica diamars den e revista JAMA Network open.
Autornan di estudio a reconoce cu e aumenta ta chikito. Pero e data ta sugeri cu e por conta pa shen miles di hende muhe. Investigadornan a encuesta aproximadamente 7,000 hende muhe seis luna prome cu e decision di Corte Supremo Mericano, y despues un otro grupo di 7,100 un aña despues di e decision. Nan a puntra si participantenan a tuma of haci algo riba nan mes pa termina nan embaraso. Esnan cu a bisa si a haya un siguiente pregunta tocante nan experencia.
“Nos data ta mustra cu pa haci abortus mas dificil pa haya no kiermen cu hende kier of mester un abortus menos frecuente,” segun Lauren Ralph, un epidemiologo na e University of California, y un di e autornan di e estudio.
E muhenan a duna varios motibo pa haci nan mesun abortus, manera deseando un medida extra di privacidad, preocupacion tocante e costo di proceduranan na clinica y preferiendo pa purba termina nan embaraso nan mes prome.
Nan a reporta di usa un variedad di metodo. Algun a tuma medicamentonan—incluyendo anticonceptivo di emergencia y e pildonan di aborto misoprostol y mifepristone obteni pafo di e sistema medico y sin prescripcion. Otronan a bebe alcohol of a usa droga. Algun a usa metodonan fisico posiblemente dañino manera dal nan mesun riba bariga, lanta cosnan pisa of hinca obhetonan den nan curpa.
Algun respondiente a bisa cu nan a sufri di complicacionnan manera sangramento y dolor y mester a busca cuido medico despues. Algun a bisa cu despues nan a haya abortus na un clinica. Algun a bisa cu nan embaraso a termina despues di nan intentonan of for di un aborto spontaneo despues, mientras cu otronan a bisa cu ultimamente nan a sigui cu nan embaraso ora e metodo no a funciona.
Ralph a nota algun limitenan di e investigacion. Respondientenan kisas no ta dunando contestanan completo of berdad, el a bisa, pasobra investigadornan ta puntrando nan tocante “un comportamento sensitivo y posiblemente criminalisa.”
Tambe el a adverti cu algun muhe por a compronde e pregunta diferente despues di e decision di Dobbs, manera keriendo cu pa haya medicamento pa aborto via telehealth ta pafo di e sistema formal siendo cu e no ta. Pero Ralph a bisa cu e y su coleganan a test con hende tabata interpretando e preguntanan prome cu cada encuesta a ser conduci.
Lo mas importante ta, segun Ferguson, cu e descubrimentonan di e estudio “ta confirma e declaracion cu nos semper a bisa: si bo haci abortus dificil pa haya den un setting formal, hende lo cuminsa haci’e informalmente.”
