For di Cas Blancoa sigura Nicolas Maduro cu awor ainda e tin tempo pa no termina manera Manuel Noriega, Pablo Escobar o Joaquin “El Chapo” Guzman. Director pa America Latino di e Conseho di Seguridad Nacional, Mauricio Claver Carone a expresa cu “ningun hende cu a confronta husticia Mericano a sali bon.”
Gobierno Mericano ta desplegando den ultimo dianan un operacion di presion pa purba pone un fin na regimen di Nicolas Maduro y laga democracia bolbe na Venezuela. Di un banda, Departamento di Estado a ofrece un plan pa liberacion di e presonan politico y pa convoca eleccion liber y democratico den cual e propio Maduro por participa. Di otro banda, husticia Mericano a acusa formalmente e dictador Venezolano y e top di e regimen di ta lidera e asina yama “Cartel de los Soles”, e cartel Venezolano cu fuerte base den forsanan arma cu a transporta miles di tonelada di cocaina pa Merca. Pa para e intentonan ey di transporte den ultimo dianan, Comando Sur di forsanan arma Mericano ta den un operacion grandi dilanti costa di Venezuela pa impedi e transporte.
Claver a bisa cu e situacion na Venezuela ta similar na esun di e caso di e dictador Panameño Manuel Noriega den añanan 80, cu a keda removi di poder pa un operacion militar Mericano. “Na Venezuela nos tin un particularidad cu nos no a mira desde decada di 80 na Panama: un personahe cu a usurpa podernan di un estado y a pone nan na servicio di narcoterorismo. E oportunidad cu ta presentando awor ta generoso, factible, y por tuma lugar cu cooperacion. Si ta confrontacion e ta busca, anto ningun modelo lo tin un final feliz pa nan.”
