Presidente Donald Trump a bisa ayera cu su administracion ta evaluando accion contra TikTok, un app Chines popular cu ta un fuente di preocupacion tocante siguridad nacional y censura.

Comentarionan di Trump a yega despues di reportenan publica bisando cu e adminsitracion tin plan pa duna orden pa ByteDance di China bende TikTok. Tambe tabatin reportenan ayera cu gigante di software, Microsoft ta den negociacion pa cumpra e app.

“Nos ta evaluando TikTok”, Trump a bisa reporteronan na Cas Blanco. “Nos por ta prohibiendo TikTok. Nos por ta haciendo otro cosnan. Tin algun opcion, pero hopi ta pasando. Pues nos lo mira kico ta pasa.”

Reportenan di Bloomberg News y e Wall Street Journal citando fuentenan anonimo a bisa cu e adminsitracion pronto lo por anuncia un decision dunando orden pa ByteDance laga su propiedad den TikTok bay.

Tin reportenan di gigantenan tecnologico Mericano y companianan financiero interesa den cumpra of inverti den TikTok, mientras administracion di Trump ta pone su bista riba e app. The New York Times y Fox Business, citando un fuente no identifica, a reporta ayera cu Microsoft ta den negociacion pa cumpra TikTok. Microsoft a nenga di duna comentario.

TikTok a duna un declaracion diabierna bisando: “Mientras nos no ta comenta riba rumornan of speculacion, nos tin tur confiansa den e exito di TikTok a largo plaso.”

ByteDance a lansa TikTok na 2017, despues a cumpra Musical.ly, un proveedor di servicio di video popular cerca adolescentenan na Merca y Europa, y a combina nan. Un servicio morocho, Douyin, ta disponibel pa usuarionan Chines.

Videonan dibertido di TikTok y su facilidad di uso a hacie inmensamente popular, y gigantenan di tecnologia Mericano manera Facebook y Snapchat ta mir’e como un menasa competitivo. E compania a bisa cu tin decenas di miyones di usuario Mericano y centenares di miyones globalmente.

Pero su doñonan Chines a causa preocupacion tocante censura di video, incluyendo esunnan critico di gobierno Chines, y e potencial pa comparti data di usuario cu oficialnan Chines.

TikTok ta insisti cu no ta censura videonan basa riba topiconan sensitivo pa China y no lo duna gobierno Chines acceso na data di usuarionan Chines hasta si ricibi solicitud. E compania a contrata un CEO Mericano, un ex- ehecutivo di Disney, den un intento pa distancia su mes di su doñonan Chines.

Oficialnan di siguridad nacional Chines ta revisando e adkisicion di Musical.ly den lunanan recien, mientras forsanan arma Mericano a prohibi nan empleadonan di instala TikTok riba celularnan di gobierno. Secretario di Estado, Mike Pompeo a bisa e luna aki cu Merca tabata considerando prohibi TikTok.

E preocupacionnan aki pa siguridad nacional ta paralelo na un accion di siguridad mas amplio di Merca contra companianan Chines, incluyendo proveedornan di telecomunicacion Huawei y ZTE. Administracion di Trump a duna orden pa Merca stop di duna fondo pa ekiponan di e proveedornan aki den rednan Mericano. Tambe a purba di convence aliadonan pa keda leu di Huawei, pa motibo di preocupacion cu gobierno Chines lo tin acceso na e data, cual e companianan a nenga.

Anteriormente, administracion di Trump a blokia of disolve acuerdonan pa preocupacion cu siguridad nacional, incluyendo stop Broadcom di Singapore di duna oferta di $117 biyon pa e fabricante di chip Mericano, Qualcomm na 2018 den un esfuerso pa yuda retene e liderazgo Mericano den espacio di telecomunicacion. Ademas a bisa Beijing Kunlun Tech Co. di China pa bende su compra na 2016 di app di cita fay, Grindr.

Otro paisnan tambe ta tumando accion contra TikTok. India e luna aki a prohibi decenas di app Chines, incluyendo TikTok, citando preocupacion pa privacidad, memey di tension entre e dos paisnan.