(AP) – Boticanan awo por receta e pildo di Covid-19 directamente na e pashentnan bao di un politica nobo di Merca, cual a ser anuncia diaranson cu e intencion di expande e uso di e pildo di Pfizer yama Paxlovid.
Food and Drug Administration a bisa cu boticanan por cuminsa revisa pashentnan pa mira si nan ta eligibel pa ricibi Paxlovid y despues receta e medicina, cual a comproba di por preveni e pio sintomanan di COVID-19. Anteriormente, solamente dokternan por a receta e pildo aki.
E anuncio aki a bini mirando cu casonan di coronavirus y hospitalisacionnan ademas di mortonan ta aumentando un biaha mas, aunke nan ta permanece na e nivelnan mas abao desde cu e brote a cuminsa na aña 2020.
Oficialnan di administracion Biden a expresa frustracion na e varios Mericanonan cu ta keda fayece di COVID-19 diariamente, a pesar di e disponibilidad di vacuna y tratamento pa esaki.
Nan tin hopi tempo ta traha caba riba acceso na Paxlovid, habriendo miles di sitio unda cu pashentna ncu test positivo por yena un formulario pa asina por ricibi Paxlovid. FDA su cambio lo haci miles di botica eligibel pa rapidamente receta y provee e pildo, cual mester ser usa trempan pa asina e por ta efectivo.
“Mirando cu Paxlovid mester ser tuma dentro di 5 dia cu e sintomanan a cuminsa, autorisacion di e boticanan aki cu licencia federal pa receta Paxlovid por expande e acceso na ricibi tratamento na tempo,” director di FDA su centro di medicamento Patrizia Cavazzoni a bisa den un declaracion.
