(AP) – Merca lo ta invirtiendo 3.2 biyon dollar pa asina por avansa e desaroyo di pildonan antivirus pa asina por trata COVID-19 y otro vrius nan peligroso cu lo por converti den un pandemia.
E programa nobo lo inverti den “acelera cosnan cu ya ta den progreso” pa COVID-19 pero cu tambe lo funciona efectivamente pa traha tratamento pa otro virusnan, Dr. Anthony Fauci, un di Merca su miho experto den enfermedadnan contagioso ta declara. Dr. Fauci a anuncia e inversion riba diahuebs na un reunion na e Cas Blanco.
“Tin algun tratamento cu ta existi pa hopi di e virusnan cu tin potencial di bira un pandemia” Fauci a comenta, e virusnan aki ta manera por ehempel Ebola, Dengue, West Nile y Middle East Respiratory Syndrome. “sinembargo, vacuna semper lo keda e clave central” Fauci ta agrega.
Merca a aproba un medicamento antivirus, cual tin e nomber remdesivir, specificamente pa COVID-19, y tambe aproba e uso di emergencia di 3 combinacion di anticurpanan cu lo yuda e sistema immuno combati e virus na un manera mas eficaz y lihe. E problema ta sinta cu e medicamentonan aki mester ser duna pa medio di transfusion na hospital, y e demanda den e temponan aki ta hopi abao pa motibo di problemanan cu logistica.
Expertonan di salud cada biaha ta haci mas y mas peticion pa un pildo conveniente cu pashentnan lo por tuma nan mes ora cu sintomanan cuminsa surgi. Algun trahadonan di medicamento ya ta haciendo test pa cu e pildonan aki, pero e resultadonan no ta spera pa algun luna mas. E fondonan nobo lo yuda acelera e proceso aki y duna apoyo na e investigacionnan di sectornan priva, desaroyo y tambe na e produccion.
Siman pasa, Merca a revela cu nan lo cumpra 1.7 miyon dosis di un pildo experimental antivirus di Merck and Ridgeback Biotherapeutics, si por logra comproba cu e ta sigur y efectivo. Resultadonan di un investigacion largo y extenso di e medicamento, molnupiravir, ta spera di ser revela pa fin di e luna benidero. Investigacionnan haci anteriormente ta mustra di cu e medicamento aki lo por reduci e riesgo di hospitalisacoin si e ser usa no hopi tempo despues di infeccion pa medio di stop e reproduccion rapido di coronavirus. Pero e no a beneficia e pashentnan cu ya tabata hospitalisa den condicion severo di e enfermedad.
Hopi otro companianan manera Pfizer, Roche y AstraZeneca tambe ta den proceso di test pildonan antivirus.
E medicamentonan cu ta disponibel aworaki ta mustra mas efectividad den yuda pashentnan preveni hospitalisacion of yuda haci e proceso di recuperacion uno mas lihe.
Bao orden di ex President Donald Trump, Merca a inverti mas di 19 biyon dollar den e desaroyo rapido di hopi diferente vacuna. Pero menos di mita di e suma aki a ser inverti den e desaroyo y creacion di tratamentonan nobo. E falta di e suma aki ta birando cada biaha un preocupacion mas grandi mirando cu e campaña di vacuna ta perdiendo forsa y expertonan ta enfatisa e importancia di maneha e enfermedad den miyon di Mericanonan cu posiblemente nunca lo dicidi di tuma e vacuna.
Te cu e siman aki, e unico medicamentonan cu ta mustra capacidad di yuda aumenta e porcentahe di sobrevivencia ta steroids cu a ser duna pa pashentnan cu ta suficientemente malo pa tin mester di extra oxygeno y cuido intensivo. Mas riba diaranson, investigadonan di United Kingdom a reporta cu un di e combinacion di anticurpanan a logra efectivamente reduci e morto nan den un estudio grandi cual a ser conduci cu pashentnant di COVID-19 hospitalisa.
