(CiberCuba) – Merca lo explora e posibilidad di renoba e acuerdonan migratorio cu Cuba, segun secretario di Seguridad Nacional, Alejandro Mayorkas, a bisa diaranson den marco di e conferencia ministerial tocante inmigracion cu administracion di Biden ta celebra cu gobierno di Panama.
E funcionario Mericano a papia durante un conferencia di prensa na Panama y a sigura cu su pais ta busca crea rutanan cu ta sigur pa migrantenan. “Nos kier evita cu e migrantenan ta cay den man di e traficantenan di persona”, e funcionario Cubano-Mericano a bisa, compaña pa e secretario di Estado, Antony Blinken.
“Nos ta propone desaroya un programa humanitario pa e inmigrantenan pa nan por establece di un manera prospero y stabiel, y duna nan e posibilidad di un bida stabiel na nan hogar nobo”, Mayorkas a sigura, ken for di su nombramento ta busca deshaci e politicanan migratorio di Donald Trump den un momento critico di e fluhonan migratorio na e frontera zuid di Merca.
“Nos ta sinti orguyoso di ta un pais di migrantenan, pero tambe nos ta un pais di leynan”, e secretario di Seguridad Nacional a señala, advertiendo cu nan lo haci tur cos posibel pa garantisa fluhonan migratorio sigur, pero cu tambe lo respeta e leynan pa esunnan cu no cumpli cu e rekisitonan pa drenta e pais.
Diamars a keda conoci e noticia cu autoridadnan di Merca y Cuba lo reuni diahuebs na Washington pa discuti e tema di migracion, den e combersacionnan formal di nivel mas halto di Washington cu La Habana desde cu presidente Joe Biden a asumi e cargo aña pasa.
E tension entre Washington y La Habana, door di e represion di e gobierno Cubano contra e protestanan, e sancionnan continuo di Merca na e isla y otro temanan a dificulta e cooperacion di e paisnan den temanan manera migracion iregular. Sinembargo, e dimensionnan di e crisis migratorio Cubano actual ta obliga e funcionarionan Mericano aborda e asunto cu e funcionarionan Cubano.
