Lider di e movemento religioso ‘La Luz del Mundo’ na Mexico, cual tin varios misa na Merca cu 1 miyon si siguido, ta acusa di trafico di persona y abuso sexual di mucha.
Naason Joaquin Garcia, di 50 aña di edad, y Susana Medina Oaxaca, di 24 aña, a wordo hiba prizon na aeropuerto di Los Angeles ora nan a yega e pais. Garcia ta wordo culpa pa 26 cargo di traficacion di persona y produccion di pornografia di mucha pa violacion, envolviendo 3 mucha muhe y un muhe, entre 2015 y 2018 na Los Angeles.
E misa a wordo funda na 1926. E ta conoci pa caso di abuso sexual pa varios aña, pero autoridad di Mexico nunca a inicia un caso. E tin mas di 15.000 misa na 58 pais, segun nan pagina web.
Garcia a forsa victima pa comete acto sexual, anto si e persona kier a nenga, esey lo bay contra Dios. El a forsa miembro di nan mesun misa, pa nan mishi cu nan y cu otro. David Correa, vocero di e misa, a bisa cu nan a ricibi e noticia den media. “Nos ta nenga di kere acusacion falso. Nos conoce e persona, e ta un homber honesto y cu honor”, Correa a bisa.
Como mil persona cu ta miembro di e misa a reuni na ‘La Luz del Mundo’ na Gaudalajara, Jalisco pa haci oracion pa Garcia, kende ta cera bou un fiansa di $25.000.000.
