(AP)—Manifestantenan a canta “Sanger riba bo mannan” na Republicanonan di e House di Tennessee ayera despues cu nan a aproba un legislacion cu lo permiti algun docente y personal carga armanan scondi riba tereno di scol, y ta prohibi mayornan y otro docente pa sa ken ta arma.
E voto di 68-28 den fabor di e legislacion a mand’e na e gobernador Republicano Bill Lee pa consideraicon. Si e firma esaki den ley, e lo ta e expansion mas grandi riba acceso pa arma den e estado desde e tirateo mortal aña pasa na un scol primario na Nashville.
Miembronan di e publico cu ta opone e legislacion a zundra e legisladornan Republicano despues di e voto, cual a resulta den House Speaker Cameron Sexton dunando orden pa kita e manifestantenan for di e galeria. Cuatro Republicano y Democraat di e House a opone e legislacion, cual e senado estatal a aproba previamente. E medida lo prohibi hende pa revela cual empleado ta cargando arma, incluyendo e mayornan di studiante y hasta otro docente. Un rector, districto escolar y agencia policial lo mester acorda pa laga empleadonan carga arma.
E propuesta ta presenta como un respuesta completamente diferente riba e tiroteo di The Covenant School cu loke Lee a propone aña pasa. E legisladornan Republicano a rechasa su empuhe pa mantene armanan leu for di hende considera como un peligro pa nan mes y otro.
Un veto pa Lee no ta probable, mirando cu e lo ta un prome di su parti y legisladornan lo mester solamente un mayoria den camara pa por continua cu nan legislacion. Republicanonan a rechasa un serie di mendamientonan di e banda Democratico, incluyendo rekisito pa permiso di mayor, notificacion ora un hende ta arma, y e districto escolar asumiendo responsabilidad civil pa cualkier herida, daño of morto pa via di un empleado cargando arma.
“Mi coleganan Republicano ta sigui mantene nos estado rehen, ta sigui mantene nos estado den sufrimento pa haci bon na e donantenan den e industria di arma,” representante di estado Democratico, Justin Jones, a bisa. “E ta moralmente loco.”
Aproximadamente mita di e estadonan na Merca ta permiti den algun forma pa docente- y otro empleadonan carga arma riba tereno di scol, segun e Gifford Law Center, un grupo di abogacia pa control riba arma. E gobernador di Iowa a firma un legislacion siman pasa creando un permiso profesional pa empleadonan di scol cu training cargando arma na scol pa proteha nan for di responsabilidad criminal of civil pa uso di forsa rasonable.
Den Tennessee, un persona a los tiro indescriminadamente den maart 2023 na The Covenant School—un scol Cristian den Nashville—y a mata tres mucha y tres adulto prome cu el a ser tira pa polis.
A pesar di e campañanan urgiendo pa medidanan di control riba arma, legisladornan a keda nenga. Nan a rechasa propuesta pa control riba arma pa e banda Democrativo y hasta pa Lee durante sesionnan anual y un sesion special, hasta mientras e mayornan di e studiantenan di The Covenant a comparti nan storia di e tiroteo y su efectonan duradero.
Bao di e legislacion aproba ayera, un empleado cu kier carga arma lo mester tin un permiso y autorisacion skirbi for di e rector di scol y agencia policial. Nan tambe lo mester un control di historia y haya 40 ora di training cu pistol. Nan no por carga arma na eventonan escolar den stadion, gymnasium of auditorio.
