(BioBio).- Departamento Mericano di Tesoro a comunica cu nan a lansa medidanan nobo di sancion, contra 10 funcionario di Venezuela, cu ta responsabel segun departamento di estado, di delito como iregularidad den proceso di eleccion, limitacion riba derecho di prensa y corupcion den proceso di distribucion di cuminda na Venezuela.
E pakete nobo di medida y sancion ta inclui representante di gobierno manera Sandra Oblitas, vice presidente di Conseho Nacional Electoral, Ernesto Villegas Poljak (Minister di Cultura), Freddy Bernal (Minister di Agricultura Urbano) y Jorge Márquez Monsalve (Despacho Presidencial), y presidente di CANTV, empresa di telefon, Manuel Fernández, hunto otro mas.
Entre grupo di personanan cu a wordo sanciona tin dos miembro di conseho electoral manera ta Socorro Hernández y Carlos Quintero; actual embahador di Venezuela dilanti di Italia, Julián Rodríguez; vice-presidente di Asamblea Constituyente, Elvis Hidrobo Amoroso, y hefe di Mision Transporte, general Carlos Osorio.
E pakete nobo di sancion a ser comunica na momento, caminda tur economia di Venezuela ta den peliger, dilanti di un stop riba e pago di su debe externo.
Den un documento oficial, Steven Mnuchin,, secretario di Tesoro di Merca a bisa cu mientras e gobierno di Venezuela lo continua ignora e deseo di nan pueblo, nos mensahe lo ta cla: Merca no lo t’ey cu nan brasa crusa”.
Mnuchin a bisa cu gobierno Mericano lo mantene den nan esfuerso, pa logra sanciona mas funcionario di gobierno di Venezuela cu ta complice di presidente Nicolas Maduro
