Diaranson Departamento di Tesoro di Merca a impone sancion contra 8 lider Venezolano, cu ta vincula cu presidente Nicolas Maduro. E ocho personanan aki tin nan activonan na Merca congela, y ciudadano Mericano tin prohibi pa participa den algun negoshi cu nan, departamento di Tesoro a bisa.
“Presidente Maduro a tuma huramento di su Asamblea Nacional Constituyente ilegal, pa permiti su dictadura mas tempo na Venezuela y asina sigura su permanencia na poder den e pais aki,” Steven T. Mnuchin, secretario di Tesoro a publica den un comunicado. “E sentimento di desprecio di e regimen di Maduro pa boluntad di pueblo di Venezuela ta inaceptabel, y Merca ta contra e regimen di tirania aki, te dia cu Venezuela lo haya atrobe su democracia pacifico y prospero,” Mnuchin a splica.
Siman cu a pasa, Merca a sanciona presidente Nicolas Maduro y dos siman pasa Merca a sanciona tambe 13 seguidor mas di Maduro.
Aki e lista di Venezolano cu a keda sanciona awor:
Adán Coromoto Chávez Frías (ruman di fayecido presidente Hugo Chávez), integrante di Asamblea Nacional Constituyente (ANC);
Francisco José Ameliach Orta, integrante di ANC;
Tania D’Ameli Cardiet, rector di Conseho Nacional Electoral (CNE);
Hermann Eduardo Escarra Malave, integrante di ANC; Erika del Valle Farias Peña, integrante di ANC; Bladimir Humberto Lugo Armas, integrante di ANC; Carmen Teresa Meléndez Rivas, integrante di ANC; Ramón Darío Vivas Velasco, integrante di ANC.
Maduro a kita poder, riba dia 30 di juli, cu diputadonan di oposicion tabatin, na momento cu su partido a celebra un votacion, cu obhetivo di crea un constitucion nobo, via e Asamblea Constituyente, cu a keda integra pa Venezolano cu ta apoya Maduro so. E grupo di hende aki cu ta conoci como ‘consituyentista’ ta consisti solamente di seguidornan di Maduro y nan lo tin e poder pa skirbi un constitucion nobo pa Venezuela.
Na luna di mei, Departamento di Tesoro di Merca a congela placa y propiedad den teritorio Mericano di ocho miembro di Tribunal supremo di husticia di Venezuela y nan a prohibi ciudadano Mericano di participa den cualkier transaccion financiero cu e grupo di Venezolano sanciona.
E entidad Mericano a bisa cu e huesnan tabata responsabel pa varios sentencia, caminda nan a tuma via ilegal contra autoridad di Asamblea Nacional Legislativo, cu a ser eligi democraticamente na Venezuela.
Maduro ta e di cuatro presidente cu a ser sanciona pa Merca. E lista ta integra pa Kim Jong-un (Korea Norte), Robert Mugabe (Zimbabwe) y Bashar al Assad (Siria). Dialuna den un acto oficial, Maduro a cuestiona e motibo di e sancion contra dje. “Dicon mi ta haya sancion? Pasobra ami ta capaz di bisa tur berdad tocante persecucion cu Donald Trump tin contra pueblo di Mexico y di Latino America, como tambe e deportacion, expulsion, abuso y tortura di gobierno di Merca riba pueblo Latino Americano.”
Gobierno di Macri, na Argentina a ordena tambe pa habri un investigacion riba tur propiedad di funcionario di Venezuela na Argentina. Diamars el a ordena 50.000 banco, entidad financiero, concesionario, inmobiliario, casino y otro empresa di Argentina pa informa si nan tin registra algun propiedad of activo di Nicolas Maduro of algun di e 13 personanan sanciona di gobierno di Maduro.
E orden di Macri ta un adhesion na e decision di gobierno di Merca, cu a ser tuma pa Donald Trump, caminda el a ordena pa congela propiedad y activo di presidente Nicolas Maduro y su principal seguidornan, pa motibo di e promocion di ANC.
