(AP)—Un hurado ta cla pa delibera si nan ta bay impone un sentencia di morto of bida den prizon sin libertad condicional riba un chauffeur di truck cu a haci declaracionnan antisemitismo prome cu el a tira mata diesun miembro di un sinagoga den e curason di e comunidad Hudiu na Pittsburgh, Merca.
E mesun huradonan cu a convicta Robert Bowers di 50 aña di edad na juni riba 63 cargo criminal a scucha e argumentonan di clausura dialuna den e fase di penal di su huicio federal, cual a tuma luga casi cinco aña despues cu e chauffeur e causa e atake mas violento contra Hudiunan den historia di Merca.
Bowers a desfila un luga di adoracion ora el a drenta e sinagoga Tree of Life dia 27 di oktober 2018, y a cuminsa basha tiro cu un AR-15 rifle, tirando tur hende cu e por a haya den un asesinato masal, cual claramente tabata motiva pa odio pa religion, segun abogado Mericano Eric Olshan.
Bowers a gaba sin fin riba red social tocante su odio pa hendenan Hudiu, uzando un termino despectivo pa hendenan Hudiu aproximadamente 400 biaha red social cual a haya sosten di esnan di ideologia derechista extremo, e abogado a recorda e huradonan.
Representantenan legal di Bowers a argumenta cu e tin schizophrenia, un malesa celebral cu ta manifesta sintomanan incluyendo halucinacion, y cu Bowers a ataca e sinagoga den un keremento halucina cu e Hudiunan tabata yuda trece un genocidio di hendenan blanco por medio di yuda refugiadonan y inmigrantenan.
Pa por impone sentencia di morto, e huradonan mester haya cu circunstancianan agravante, cual ta haci e crimen specialmente hororoso, ta pesa mas cu e factornan cu por ser considera como loke por disminui su culpabilidad. E circunstancianan agravante ey por inclui e vulnerabilidad di e victimanan anciano y cu descapacidad y su atake dirigi pa hendenan Hudiu.
Olshan, cu a cuminsa su presentacion dialuna por medio di presenta e composito di yamadanan pa polis haci den e sinagoga, a bisa cu Bowers a tuma bida di “11 hende, 11 bida completo, 11 hende cu a stima nan famia 11 hende cu a stima nan amigonan, 11 hende cu tabata stima….con bo por midi e impacto di tur e perdidanan ey?”
E fiscal a conta tocante e cuido di Joyce Fienberg (75) pa su famia y e devocion di Richard Gottfried (65) pa su fe. El a bisa cu dr. Jerry Rabinowitz (66) tabatin e caracter di un dokter rural: “E tabata stima yuda mamanan trece nan baby den mundo pero e nunca a husga ningun hende.” David Rosenthal (54) y Cecil Rosenthal (59), rumannan cu descapacidad intelectual, “tabata stima bida.” Pero kisas ma cu tur cos, nan tabata stima Tree of Life.”
E otro victima tabata Rose Mallinger (97); Bernice Simon (84) y su casa Sylvan Simon (86); Dan Stein (71); Melvin Wax (87) y Irving Young (69). E atake tambe a herida shete hende, incluyendo seis agente policial. A tira Bowers tres biaha prome cu el a entrega su mes despues cu su municion a caba.
