(AP) — Un gran hurado estatal, convoca riba peticion di Gobernador di Florida, Ron DeSantis, pa investiga “cualkier mal maneho” di e vacuna di COVID-19, no a haya evidencia di actividad criminal, segun un rapport cu a ser publica ayera.
“E hecho cu no a haya ningun actividad criminal no ta nifica cu nos no a haya ningun problema. Al contrario, tin duda profundo y serio cu ta envolve e proceso di desaroyo di vacuna y supervisa su seguridad den Merca,” e gran hurado a skirbi den su rapport final.
Den un reaccion na e descubrimentonan, e gran hurado a entrega su recomendacionnan, cual ta inclui mas transparencia durante ensayonan clinico y prohibicion di propaganda pa medicamentonan farmaceutico.
E Centro pa Control y Prevencion di Malesa (CDC) ta sostene cu e vacunanan di COVID-19 a pasa un analisis di seguridad intensivo y cu nan ta sigui ser monitorea despues di aprobacion di e FDA pa garantisa cu nan ta cumpli cu e standardnan federal di seguridad y eficacia.
Aunke e vacunanan no ta perfecto, nan ta haci un bon trabao pa preveni enfermedad serio, hospitalisacion y morto. Nan a prueba di ta hopi safe, y efectonan serio no ta hopi comun, segun oficialnan federal y expertonan den salud publico.
DeSantis a solicita e investigacion na 2022, prome cu su candidatura pa nominacion presidencial di partido Republicano y mientras e tabata ampliando su perfil nacional cu oposicion fuerte contra lock down y mandato pa tapa boca.
E tempo ey, DeSantis a bisa cu e investigacion lo “trece responsabilidad legal pa esnan cu a comete mal maneho” y por yuda haya mas informacion di companianan farmaceutico tocante e vacunanan y e posible efectonan di esakinan.
Un vocero di e gobernador no a responde inmediatamente ayera na un peticion pa comentario di Associated Press.
Gran huradonan estatal, normalmente forma cu 18 persona, por investiga actividadnan criminal y duna condenacion pero tambe examina problemanan sistemico den Florida y duna recomendacionnan. Durante e ultimo añanan, otro panelnan a trata asuntonan di inmigracion y seguridad na scol.
