(AP)—Gobernador di Tennesse, Bill Lee, a aproba un legislacion permitiendo e sentencia di morto den conviccionnan di abuso sexual di mucha, un cambio cu e Statehouse a apoya durante un tempo di preocupacionnan cu e corte supremo Mericano a prohibi castigo capital den casonan asina.
Lee, un republicano, a aproba e legislacion siman pasa sin publica un declaracion. E ley nobo d Tennessee, cual ta drenta den efecto dia 1 di juli, ta autorisa e estado pa persigui castigo capital ora un adulto ser condena di abuso sexual di un mucha. Esnan condena por haya sentencia di morto, sentencia di bida den prizon sin posibilidad di condicion, of sentencia di bida den prizon normal.
Gobernador di Florida, Ron DeSantis a implementa un legislacion similar casi un aña pasa. Un par luna despues di implementacion, fiscalnan na Florida a anuncia den december cu nan tabata persiguiendo e castigo di morto pa un homber acusa di a comete violencia sexual contra un mucha bao di diesdos aña. Segun e Death Penalty Information Center, ta considera e caso pa ta e prome di ta persigui bao di e ley nobo.
Mientras tanto, e House di Idaho controla pa Republicanonan a aproba un legislacion similar na comienso di aña, pero e propuesta eventualmente a keda para den e Senado. Mientras cu apoyadonan di e version di Tennesee a admiti cu aunke e Estado Boluntario a permiti den pasado pa un abusado di mucha condena enfrenta e castigo di morto, e corte supremo Mericano ultimamente a anula e leynan cu su decision di 2008, concluyendo cu ta inconstitucional pa usa castigo capital den casonan di violencia sexual contra mucha.
Sinembargo, nan ta spera cu e corte supremo lo cambia e huicio ey awo—referiendo na e esfuerso cu a tuma pa cambia e ley di Roe v. Wade di e caso di 1973 cu a legalisa abortus den henter e nacion pero eventualmente a ser cambia na 2022. “Porta awo e atmosfeer ta diferente den e corte supremo,” segun senador republicano Janice Bowling. “Simplemente nos ta desafiando e huicio.”
Lee a conta reporteronan ayera cu e no a firma e legislacion cu e speransa cu esaki lo ser desafia den corte. El a bisa cu crimennan contra mucha ta “un di e mas hororoso cu tin.” Legisladonan democratico y abogadonan di mucha ta preocupa cu e ley por trece mas miedo den victimanan di abuso sexual di mucha cu pa bin dilanti lo resulta den un ehecucion, advertiendo cu hopi mucha ta ser abusa pa miembronan di famia of amigonan di famia. Otro a alega cu abusadonan por ta mas probable pa mata nan victima pa asina scapa un castigo mas streng.
Ley di ehecucion na Merca ta dicta cu crimennan mester envolve un morto di victima of traicion contra gobierno pa ta eligible pa e castigo di morto. E corte supremo a dicidi casi 40 aña pasa cu ehecucion ta demasiado streng pa asalto sexual, y huesnan a tuma un decision similar na 2008 den un caso envolviendo e abuso sexual di un mucha.
Actualmente, tur ehecucionnan na Tennesee ta riba pausa mientras oficialnan estatal ta evaluando cambionan na su proceso di inyeccion letal. Gobernador Lee a implementa e pausa despues cu un rapport na 2022 a detaya varios fayo den con prizoneronan na Tennessee ta ser ehecuta.
