(AP)—Gobernador di Massachusetts Maura Healey a bisa diaranson cu e lo suministra absolucion pa dies miles di hende cu conviccion di carganan delito pa posesion di cannabis cu ta bay back varios decada den e ehempel mas recien di un estado buscando pa absolve ofensornan di droga menor.
Si aproba esaki, e absolucion lo aplica pa tur conviccion adulto di delito prome cu 13 di maart 2024, pa posesion di marihuana of “substancia di Clase D.” Mayoria hende no mester tuma ningun accion pa nan historia criminal ser modifica, segun e Democrata y ex-procurador general di e estado.
E absolucionnan lo tuma efecto solamente di e Conseho di Gobernador aproba e decision di Healey. Absolucionnan lo bira efectivo inmediatamente despues di e votacion di conseho, aunke por tuma tempo pa modifica historianan criminal.
Healey a describi e absolucionnan como e acto mas extensivo di un gobernador desde cu presidente Joe Biden a absolve conviccionnan federal pa posesion di marihuana y a haci un yamado riba gobernadornan pa haci mescos. Healey a bisa cu e absolucionnan lo aplica pa esnan cu a ser deteni hasta durante e guera riba droga den añanan 1970 y mas prome.
Basicamente, e absolucionnan ta actua como pordon inicia pa e gobernador pa un conviccion. E no ta cera of deshaci di historia criminal automaticamente. Healey a bisa cu e absolucionnan ta un asunto di husticia. “Massachusetts a decriminalisa posesion pa uso personal na 2008, a legalisa esaki na 2016, pero miles di hende ta bibando ainda cu un conviccion riba nan historia—un conviccion cu por stroba den obtencion di trabao, vivienda y hasta un educacion,” el a bisa.
Procurador general di Massachusetts Andrea Campbell a bisa cu e ta apoya e esfuersonan di Healey. El a bisa cu conviccionnan pa posesion simpel di marihuana por tin consecuencianan di bida. “E consecuencianan ta multiplica ora bo considera cu un cantidad desproporciona di esnan cu a ser deteni y condena pa posesion di marihuana ta hendenan di color,” el a bisa.
E administracion a calcula cu e absolucionnan anuncia diaranson por beneficia cienmiles di hende.
E absolucion no ta aplica pa otro conviccion relaciona cu marihuana manera posesion cu intento pa distribui, distribucion, traficacion of operando un vehiculo di motor bao influencia of conviccion di hurisdiccion pafo di Massachusetts, incluyendo corte federal.
Na 2016, votadonan di e estado a aproba un propuesta legalisando marihuana, e mesun aña cu votadonan den California y Nevada a legalisa marihuana recreacional tambe.
Den e añanan desde 2016, un industria di marihuana legal a ser estableci na Massachusetts, hasta mientras e droga ta keda ilegal riba nivel federal. Den december, Biden a absolve miles di hende condena cu e uso y posesion simple di marihuana riba tera federal y den District of Columbia (D.C.).
E cas blanco a bisa e tempo ey cu e ronda mas recien di clemencianan ehecutivo tabata diseña pa rectifica diferencianan entre rasa den e sistema di husticia. Biden a bisa cu su accionnan lo yuda haci “e promesa di husticia igual un realidad.”
E accion di e presidente tabata diseña pa construi riba un ronda similar di absolucion suministra net prome cu e eleccionnan di termino medio di esnan condena di posesion simple riba tera federal. E tempo ey, Biden a haci un yamado riba gobernadornan pa suministra absolucionnan similar pa esnan condena cu ofensanan di marihuana estatal, cual ta refleha e mayoria di casonan di posesion di marihuana.
Como un candidato democratico pa gobernador na 2022, Healey a indica cu e lo acepta e yamado di Biden. Otro estadonan a haci movidanan similar.
Gobernador di Rhode Island Dan McKee a firma un legislacion na 2022 legalisando y regulando marihuana recreacional y pa deshaci di otro carganan di posesion di marihuana automaticamente. Na 2022, votadonan di Missouri a aproba un amienda constitucional legalisando marihuana y yamando pa deshaci di historianan di detencionnan den pasado y conviccionnan pa ofensanan di marihuana no violento, cu e excepcion di bendemento pa menornan of coriendo auto bao influencia.
Gobernador di Connecticut Ned Lamont a anuncia na 2022 cu miles di residente condena cu posesion di cannabis lo tin un historia limpi usando un metodo automatico pa deshaci di esakinan. Historianan den aproximadamente 44,000 caso lo ser completamente of parcialmente deshaci.
Tambe na 2022, un luna despues cu Biden a haci mescos bao ley federal, gobernador di Oregon Kate Brown a anuncia cu e tabata absolviendo aproximadamente 45,000 hende condena cu posesion simple di marihuana.
